AQShning Florida shtatidagi Elgin aviabazasidan uchirilgan F-15E Strike Eagle qiruvchi-bombardimonchi samolyoti sinovdan o‘tkazildi, u GBU-72 Advanced 5K Penetrator rusumli yangi beton buzuvchi bomba yordamida yaqin masofadagi yuqori himoyalangan nishonni yo‘q qildi. Bu haqda AQSh Harbiy-havo kuchlariga tayanib The Defense Post xabar berdi.
Og‘irligi 2,3 tonna bo‘lgan aviabomba o‘rtacha chuqurlikdagi beton buyumlarni, xususan, Shimoliy Koreya va Eronning atom sanoati obyektlari va buyruq markazlarida joylashgan bunkerlarga o‘xshash obyektlarni o‘rtacha bombardimonchilar yordamida yo‘q qilishga mo‘ljallangan.
Aviabomba yer ostiga 30 metrgacha kirishga yoki 6 metrgacha qalinlikdagi betonni teshishga qodir.
“5000 funtlik (2,3 tonnadan ortiq) bu bombaning tashlanishi uning bir qator sinovlari tugaganini anglatadi”, — deyiladi xabarda.
Ushbu yangicha boshqariladigan aviabombani yaratish ishlari 2017-yildan beri davom etmoqda. AQSh Harbiy-havo kuchlari uni 2022-yilda sotib olishni rejalashtirgan. 125 ta bombadan iborat birinchi partiyaning narxi 36 million dollarni tashkil qiladi, butun AQSh harbiy-havo kuchlariga kamida 2 mingta shunday bomba keltirish rejalashtirilgan.
Bu aviabombalar bilan F-15E’dan tashqari, F-16 qiruvchi samolyotlarini, shuningdek, beshinchi avlod F-35 qiruvchi samolyotlarini jihozlash rejalashtirilgan. Shu bilan birga, bu Amerikaning yadroviy bo‘lmagan eng katta va eng kuchli aviabombasi emas. AQSh Harbiy-havo kuchlarida og‘irligi 10 tonnagacha bo‘lgan Massive Ordnance Air Blast va og‘irligi 13,6 tonnalik Massive Ordnance Penetrator bombalari mavjud, ularni faqat og‘ir strategik bombardimonchilar olib yura oladi.
Izoh (0)