Janubiy Afrika Respublikasining marhum prezidenti Nelson Mandelaning shaxsiy buyumlari kimoshdi savdosiga qo‘yildi. Bu haqda Reuters xabar berdi.
Nelson Mandelaning qarindoshlari prezidentning shaxsiy buyumlarini sotib, tushgan mablag‘larni uning sharafiga qurilayotgan yodgorlik bog‘iga yo‘naltirmoqchi.
Taxminan 100 ta buyumdan iborat to‘plamda Mandelaning rasmiy tadbirlarda, jumladan, 1998 va 2003-yillarda Buyuk Britaniya qirolichasi Yelizaveta bilan uchrashgan paytda kiygan mashhur rang-barang naqshli madiba ko‘ylaklari bor. Ushbu kiyimlar sabab JARda Nelson Mandela Madiba nomi bilan ham tanilgan, bu kosalar xalqi qabilalaridan birining nomi.
Nyu-Yorkdagi Guernsey’s auksion uyi rahbari Arlan Ettingerning aytishicha, ko‘ylaklar buyuk rahbarga quvonch bag‘ishlar va uni boshqa siyosatchilardan ajratib turardi. Qayd etilishicha, o‘nta ko‘ylak Nyu-York texnologiya instituti moda muzeyida turli auditoriyalar va talabalarga saboq berish va ularni ilhomlantirish uchun uch hafta davomida ko‘rgazmaga qo‘yiladi.
AQSh sobiq prezidenti Barak Obama va boshqa davlat rahbarlarining sovg‘alari hamda Mandelaning ko‘zoynagi, portfellari va shimlari ham JARning Kunu shahridagi Nelson Mandela Ozodlik bog‘ini moliyalashtirish uchun sotilmoqda. Mandela o‘sha yerga dafn etilgan.
Nelson Mandela — Janubiy Afrikaning davlat va siyosat arbobi. U 1994-yil 10-maydan 1999-yil 14-iyunga qadar JAR prezidenti bo‘lgan. 27 yil tutqunlikda o‘tirgan Mandela aparteid davrida inson huquqlari uchun kurashgan eng taniqli faollardan biri. U 1993-yilda tinchlik bo‘yicha Nobel mukofoti laureati bo‘lgan.
Izoh (0)