Tashkent City xalqaro ishbilarmonlik markazi direksiyasi 2021-yil 14-oktabrdan Tashkent City bog‘i hududiga kirish bepul bo‘lganini e’lon qildi. Direksiya rahbari Bahrom Rizayev “Daryo” muxbiri Musulmonbek Ibrohimovga bergan intervyuda bog‘ga kirish nega bepul qilinganiga izoh berdi.
Uning aytishicha, Tashkent City tizimida parkni boshqarish kompaniyasi bor. Ushbu kompaniya yangi strategiyani ishlab chiqqan. Bu bo‘yicha parkda — ochiq havoda festival, ko‘rgazmalar, ommaviy dasturlar tayyorlanadi va o‘tkaziladi. Shu ishlardan tushgan mablag‘lar park xarajatlarini qoplashga sarflanadi.
“Qandaydir yo‘l bilan odamlarni jalb qilib, servislarni ko‘paytirib, biror tadbirlar o‘tkazish va shularning orqasidan pul ishlab, xarajatlarni qoplashga harakat qilyapmiz. Ya’ni, kelib-ketadigan odamlarga zarar qilmay, kirishga pul olmay, o‘z xarajatlarimizni qoplash masalasini o‘ylayapmiz”, — dedi Bahrom Rizayev.
Biroq, Tashkent City’ga kirish qachongacha bepul bo‘lishini aniq aytolmasligini bildirdi.
“Kirish qachongacha bepul bo‘lishi haqida aniq sana aytolmaymiz. Parkni saqlab turish uchun oyiga 900 million so‘m atrofida malag‘ sarf etiladi. Park qurilishida ham, hozir ham budjetdan hech qanday pul aralashmagan. Bog‘ investorlardan tushgan mablag‘lar evaziga qurilgan. Biz uchun qandaydir alohida imtiyozlar yo‘q, hamma parklar qatori to‘lovlarni to‘laymiz”, — deb ta’kidladi u.
Eslatib o‘tamiz, 2019-yilning oktabr oyida Jahongir Ortiqxo‘jayev Tashkent City ochilishi munosabati bilan qilgan videomurojaatida “Bu — xalqimiz uchun. Bu joy — millatimiz uchun. Ilohim, millatimizga ushbu yaxshi joy buyursin! Xalqimiz kelib yayrasin! Farzandlari bilan o‘ynab-kulsin! Hammasi xalqimiz, O‘zbekiston xalqi uchun va aziz, mehribon millatimiz uchun!”, — deb aytgandi.
2020-yil 17-dekabrdan boshlab Tashkent City bog‘iga bayram arafasi va Yangi yil kunlarida kirish pullik etib belgilandi. Bayram chiptalari narxi 5 yoshgacha bo‘lgan bolalarga — bepul, 5 yoshdan 12 yoshgacha bo‘lgan bolalar uchun — 5 000 so‘m, 12 yoshdan kattalar uchun — 10 000 so‘m, pensionerlarga — 5 000 so‘m (guvohnoma mavjud bo‘lgan taqdirda), nogironligi bo‘lgan shaxslarga — bepul (guvohnoma mavjud bo‘lgan taqdirda), yengil avtomobilda kirish — 20 000 so‘m (yo‘lovchilarni hisobga olgan holda) etib belgilandi.
O‘shanda Tashkent City xalqaro ishbilarmonlik direksiyasi rahbari jurnalistlarning bog‘ga kirish nima uchun pullik bo‘lgani haqidagi savollariga javob berib, “pullik rejim bir oyga rejalashtirgani”ni ma’lum qilgandi. “Agar jamoatchilikning salbiy e’tirozlariga sabab bo‘lsa, keyin pullik rejim bekor qilinadimi?” degan savolga esa aniq bir javob bermagandi.
Dastlabki reja bo‘yicha, pullik kirish tartibi 10-yanvarga qadar davom etishi kerak edi. Biroq 11-yanvar kuni Bahrom Rizayev pullik kirish tartibini 31-martga qadar uzaytirish to‘g‘risida buyruq chiqardi. Shundan buyon bog‘ga kirish pullik bo‘lib kelayotgandi. Buyruqda pullik kirish tartibi park faoliyatini saqlab turish xarajatlarini hamda bog‘ infratuzilma va obyektlarini 2021-yilgi mavsumga tayyorlash xarajatlarini moliyalashtirish maqsadida uzaytirilgani aytilgan.
Izoh (0)