Samarqand viloyati Payariq tumanida Toshkent shahridagi tadbirkorlarni katta pulga “tushirgan” shaxslar aniqlandi, deya xabar bermoqda Bosh prokuratura huzuridagi Departament matbuot xizmati.
Bosh prokuratura huzuridagi Departamentning Payariq tuman bo‘limi xodimlari tomonidan tadbirkorlik subyektlarining huquqlarini himoya qilish yuzasidan tergovga qadar tekshiruv o‘tkazilgan.
Unda fuqaro T.M. va boshqalar tumandagi “D.” MChJ hamda “M.” oilaviy korxonasini boshqargan davrida Toshkent shahridagi “D.”va “P.” MChJlar hamda “E.” xususiy korxonasining 548,5 million so‘mlik mulkini firibgarlik yo‘li bilan qo‘lga kiritgani aniqlangan.
Bundan tashqari ular fuqaro Sh.ning ishonchiga kirib, uning nomiga yuqoridagi subyektlardan 171 million so‘mlik mebel jihozlarini qabul qilib olgani to‘g‘risida hujjatlarni rasmiylashtirib, mahsulotlar sotuvidan tushgan naqd pul mablag‘larini bank muassasasiga topshirmasdan savdo qoidalarini buzgani aniqlangan.
Mazkur holat yuzasidan Jinoyat kodeksining 168-moddasi (firibgarlik) va 189-moddasi (savdo yoki xizmat ko‘rsatish qoidalarini buzish) bilan jinoyat ishi qo‘zg‘atilib, tergov harakatlari o‘tkazilmoqda.
Bundan avval Toshkent viloyatida 10 ming dollarni noqonuniy sotishga uringan shaxslar ushlangani, Farg‘onada tadbirkorga energetik ichimlik dilerligini va’da qilib, uni qariyb 270 million so‘mga chuv tushirgan shaxsga jinoyat ishi qo‘zg‘atilgani hamda Andijonda o‘zini Ispaniya banki vakili deya tanishtirib, 200 ming dollar kredit olib berish uchun pul talab qilgan shaxs ushlangani haqida xabar berilgandi.
Izoh (0)