Tashkent City халқаро ишбилармонлик маркази дирекцияси 2021 йил 14 октябрдан Tashkent City боғи ҳудудига кириш бепул бўлганини эълон қилди. Дирекция раҳбари Баҳром Ризаев «Дарё» мухбири Мусулмонбек Иброҳимовга берган интервьюда боғга кириш нега бепул қилинганига изоҳ берди.
Унинг айтишича, Tashkent City тизимида паркни бошқариш компанияси бор. Ушбу компания янги стратегияни ишлаб чиққан. Бу бўйича паркда — очиқ ҳавода фестиваль, кўргазмалар, оммавий дастурлар тайёрланади ва ўтказилади. Шу ишлардан тушган маблағлар парк харажатларини қоплашга сарфланади.
«Қандайдир йўл билан одамларни жалб қилиб, сервисларни кўпайтириб, бирор тадбирлар ўтказиш ва шуларнинг орқасидан пул ишлаб, харажатларни қоплашга ҳаракат қиляпмиз. Яъни, келиб-кетадиган одамларга зарар қилмай, киришга пул олмай, ўз харажатларимизни қоплаш масаласини ўйлаяпмиз», — деди Баҳром Ризаев.
Бироқ, Tashkent City’га кириш қачонгача бепул бўлишини аниқ айтолмаслигини билдирди.
«Кириш қачонгача бепул бўлиши ҳақида аниқ сана айтолмаймиз. Паркни сақлаб туриш учун ойига 900 миллион сўм атрофида малағ сарф этилади. Парк қурилишида ҳам, ҳозир ҳам бюджетдан ҳеч қандай пул аралашмаган. Боғ инвесторлардан тушган маблағлар эвазига қурилган. Биз учун қандайдир алоҳида имтиёзлар йўқ, ҳамма парклар қатори тўловларни тўлаймиз», — деб таъкидлади у.
Эслатиб ўтамиз, 2019 йилнинг октябрь ойида Жаҳонгир Ортиқхўжаев Tashkent City очилиши муносабати билан қилган видеомурожаатида «Бу — халқимиз учун. Бу жой — миллатимиз учун. Илоҳим, миллатимизга ушбу яхши жой буюрсин! Халқимиз келиб яйрасин! Фарзандлари билан ўйнаб-кулсин! Ҳаммаси халқимиз, Ўзбекистон халқи учун ва азиз, меҳрибон миллатимиз учун!», — деб айтганди.
2020 йил 17 декабрдан бошлаб Tashkent City боғига байрам арафаси ва Янги йил кунларида кириш пуллик этиб белгиланди. Байрам чипталари нархи 5 ёшгача бўлган болаларга — бепул, 5 ёшдан 12 ёшгача бўлган болалар учун — 5 000 сўм, 12 ёшдан катталар учун — 10 000 сўм, пенсионерларга — 5 000 сўм (гувоҳнома мавжуд бўлган тақдирда), ногиронлиги бўлган шахсларга — бепул (гувоҳнома мавжуд бўлган тақдирда), енгил автомобилда кириш — 20 000 сўм (йўловчиларни ҳисобга олган ҳолда) этиб белгиланди.
Ўшанда Tashkent City халқаро ишбилармонлик дирекцияси раҳбари журналистларнинг боғга кириш нима учун пуллик бўлгани ҳақидаги саволларига жавоб бериб, «пуллик режим бир ойга режалаштиргани»ни маълум қилганди. «Агар жамоатчиликнинг салбий эътирозларига сабаб бўлса, кейин пуллик режим бекор қилинадими?» деган саволга эса аниқ бир жавоб бермаганди.
Дастлабки режа бўйича, пуллик кириш тартиби 10 январга қадар давом этиши керак эди. Бироқ 11 январь куни Баҳром Ризаев пуллик кириш тартибини 31 мартга қадар узайтириш тўғрисида буйруқ чиқарди. Шундан буён боғга кириш пуллик бўлиб келаётганди. Буйруқда пуллик кириш тартиби парк фаолиятини сақлаб туриш харажатларини ҳамда боғ инфратузилма ва объектларини 2021 йилги мавсумга тайёрлаш харажатларини молиялаштириш мақсадида узайтирилгани айтилган.
Изоҳ (0)