Kanadalik ayol yostig‘iga kelib tushgan meteoritdan uyg‘onib ketib, qo‘rqqanidan qutqaruv xizmatini yordamga chaqirdi, deb xabar beradi Hi-Tech.Mail.ru.
Ta’kidlanishicha, ayol portlash ovozidan uyg‘onib ketgan va yuziga qandaydir bo‘laklar kelib tushganini sezgan. U karavotidan sakrab tushib, qutqaruv xizmatiga qo‘ng‘iroq qilgan. 911 operatori bilan suhbat jarayonida ayol yostiqlardan birini ko‘targan va karavotida tosh yotganini ko‘rgan. Avvaliga ayol toshni vaqti-vaqti bilan portlashlar amalga oshiriladigan qurilish maydonchasidan uchib keldi deb o‘ylagan. Ammo telefon orqali qurilish kompaniyasiga murojaat qilganida, unga portlash ishlari amalga oshirilmaganini aytishgan. Quruvchilar osmonda uchayotgan obyektga guvoh bo‘lishganini ham bildirgan.
G‘arbiy Ontario universiteti xodimlari toshning meteorit ekanini ayolga tasdiqlagan. Hozirda u ekspertizaga jo‘natilgan, biroq tadqiqotlar yakunlangach Rut Gamilton meteoritni olib ketib, xotira uchun saqlab qo‘yish niyatida.
Fizika va astronomiya kafedrasi professori Piter Barunning ta’kidlashicha, bu kabi holatlar oldin ham kuzatilgan. 2021-yilda meteoritlardan biri Indoneziyadagi uylardan biriga kelib tushgan.
Avvalroq Birlashgan Millatlar Tashkilotining Koinotdan tinch maqsadlarda foydalanish bo‘yicha qo‘mitasi Yerga rekord darajada ko‘p asteroidlar xavf solayotganini ma’lum qilgandi.
Eslatib o‘tamiz, mart oyida NASA yaqin 100 yil ichida Yerning asteroidlar bilan to‘qnashish xavfi qay darajadaligini baholagandi. Unga ko‘ra, yaqin yuz yil ichida Yerning asteroidlar bilan to‘qnashish xavfi mavjud emas.
Izoh (0)