Нью-Йоркдаги Беларусь бош консулхонаси 21 октябрдан ўз ишини тўхтатади. Бу ҳақда бош консулхона сайтига таяниб, «Интерфакс» хабар берди.
«Сизга шуни маълум қиламизки, Америка томонининг талабига биноан Беларуснинг Нью-Йоркдаги бош консулхонаси 2021 йил 21 октябрда ўз фаолиятини тўхтатади», — дейилади хабарда.
Қайд этилишича, бош консулхона консуллик округи ҳудудида (жумладан, Канадада) яшовчи Беларусь фуқаролари муассаса ёпилганидан сўнг, консуллик ҳаракатлари учун Вашингтондаги Беларусь элчихонасига ариза бериши мумкин.
Хабарга кўра, 15 октябргача бош консулхонада шахсий қабул учун илгари рўйхатдан ўтган беларусликлар консуллик ҳаракатлари учун ҳужжатларини топшириши мумкин. 15 октябрдан кейин бош консулхона идорасига киришга рухсат берилмайди. 8 октябрдан телефон орқали консультация бериш тўхтатилган.
Сентябрь ойи бошида Беларусь ташқи ишлар вазири Владимир Макей Минск АҚШдаги элчиси этиб кимни тайинлаш тўғрисида қарор қабул қилганини, лекин ҳозирги шароитда уни АҚШга юбориш учун ҳеч қандай сабаб кўрмаётганини айтган.
Ўз навбатида АҚШнинг Минскдаги элчихонаси август ойи охирида республикадаги дипломатик миссиясини қисқартирганини эълон қилди.
Минскка қарши Америка санкцияларининг қайта тикланиши фонида Беларусь Ташқи ишлар вазирлиги АҚШга Минскдаги элчихонаси ходимлари сонини 1 сентябрга қадар 5 кишигача камайтиришни таклиф қилганди. Шунингдек, Беларусь Жули Фишерни АҚШнинг Беларусдаги элчиси этиб тайинлашга илгари берилган розилигини қайтариб олган.
Беларусдаги АҚШ элчиси лавозими 2008 йилдан бери бўш турибди. 2020 йил декабрь ойида АҚШ Давлат департаменти унга Фишернинг номзодини маъқуллади, лекин у Минскка келмаган. Элчининг аккредитацияси тугалланмаган, Фишернинг Беларусь билан ҳеч қандай расмий алоқаси йўқ, деган эди ўша пайтда Минскдаги расмийлар.
Фишер Беларусдан ташқарида мамлакат мухолифати вакиллари билан алоқаларни сақлаб турибди.
2021 йил июнь ойида АҚШ Беларусга қарши санкцияларни янада кенгайтирган, 16 нафар жисмоний шахс, 5 та идора ва ташкилотга нисбатан чекловлар жорий қилинганди. Кейинчалик Европа Иттифоқи ҳам Беларусга қарши янги санкциялар қўллаган. Минск мазкур чекловларни иқтисодий урушга қиёслаган.
Изоҳ (0)