Eronning birinchi prezidenti Abulhasan Banisadr vafot etdi. Bu haqda sobiq prezidentning oilasidagi manbalariga tayanib Iran International nashri xabar berdi.
Sobiq siyosatchi 88 yoshda edi. Nashr bergan axborotga ko‘ra Banisadr Parijdagi Salpetri kasalxonasida uzoq davom etgan xastalik oqibatida vafot etgan.
Banisadr 1980-yil fevralidan 1981-yil iyun oyiga qadar Eronning birinchi prezidenti sifatida mamlakatni boshqargan.
Abulhasan Banisadr 1933-yil 22-martda tug‘ilgan. U maktabni tamomlaganidan keyin Tehron universitetiga o‘qishga kirgan va u yerda huquq hamda iqtisod yo‘nalishlarida tahsil olgan. Keyinchalik to‘rt yil davomida Ijtimoiy tadqiqotlar institutida ishlagan.
Banisadr universitetda o‘qib yurgan vaqtida “Milliy front” talabalar harakatiga qo‘shilgan, harakat ishtirokchilari 1960-yillarda amaldagi hukmron tizimga qarshi chiqqan va monarxlar pozitsiyasiga qarshi turgan. Abulhasan Banisadr norozilik namoyishlarining birida yaralangan va shundan keyin Fransiyaga ketgan. Sorbonna universitetida o‘qishni davom ettirgan bo‘lajak prezident bu yerda iqtisodiyot bo‘yicha doktorlik ilmiy darajasini olgan.
1979-yilda Banisadr Eronga qaytgan va Islom inqilobi kengashining tarkibiga kiritilgan, keyinchalik iqtisodiyot va moliya vaziri lavozimini egallagan, shuningdek, muayyan vaqt davomida tashqi ishlar vaziri vazifasini ham bajargan. Keyin uni mamlakatning yangi konstitutsiyasi loyihasini tayyorlaydigan ekspertlar kengashi a’zoligiga saylashdi.
1980-yil fevralda u saylovlarda 76 foiz ovoz oldi va Eronning birinchi prezidenti sifatida mamlakatni boshqardi. 1981-yil iyunda Banisadrni musulmonlar ruhiyatiga zid faoliyat olib borganlikda ayblab, unga impichment e’lon qilishdi va prezidentni boshqaruvdan chetlatish maqsadida norozilik namoyishlari uyushtirildi. U “prezidentlik kursisidan quladi”. Shundan keyin Banisadr yana Fransiyaga ketdi. U bir necha marta Eron hukumatining siyosatini tanqid qilgan va amaldorlarni zo‘ravonlik hamda qonunlarga zid ish ko‘rish, ularga bo‘ysunmaslikda ayblagan.
Eslatib o‘tamiz, sentabr oyida Jazoirni 20 yil davomida boshqargan sobiq prezident Abdulaziz Buteflika vafot etgan. Aprel oyida esa Chad davlatining 30 yillik prezidenti isyonchilar bilan jangda halok bo‘lgan, shuningdek, AQSh sobiq vitse-prezidenti Uolter Mondeyl 93 yoshida vafot etgandi.
Izoh (0)