Эроннинг биринчи президенти Абулҳасан Банисадр вафот этди. Бу ҳақда собиқ президентнинг оиласидаги манбаларига таяниб Iran International нашри хабар берди.
Собиқ сиёсатчи 88 ёшда эди. Нашр берган ахборотга кўра Банисадр Париждаги Сальпетри касалхонасида узоқ давом этган хасталик оқибатида вафот этган.
Банисадр 1980 йил февралидан 1981 йил июнь ойига қадар Эроннинг биринчи президенти сифатида мамлакатни бошқарган.
Абулҳасан Банисадр 1933 йил 22 мартда туғилган. У мактабни тамомлаганидан кейин Теҳрон университетига ўқишга кирган ва у ерда ҳуқуқ ҳамда иқтисод йўналишларида таҳсил олган. Кейинчалик тўрт йил давомида Ижтимоий тадқиқотлар институтида ишлаган.
Банисадр университетда ўқиб юрган вақтида «Миллий фронт» талабалар ҳаракатига қўшилган, ҳаракат иштирокчилари 1960 йилларда амалдаги ҳукмрон тизимга қарши чиққан ва монархлар позициясига қарши турган. Абулҳасан Банисадр норозилик намойишларининг бирида яраланган ва шундан кейин Францияга кетган. Сорбонна университетида ўқишни давом эттирган бўлажак президент бу ерда иқтисодиёт бўйича докторлик илмий даражасини олган.
1979 йилда Банисадр Эронга қайтган ва Ислом инқилоби кенгашининг таркибига киритилган, кейинчалик иқтисодиёт ва молия вазири лавозимини эгаллаган, шунингдек, муайян вақт давомида ташқи ишлар вазири вазифасини ҳам бажарган. Кейин уни мамлакатнинг янги конституцияси лойиҳасини тайёрлайдиган экспертлар кенгаши аъзолигига сайлашди.
1980 йил февралда у сайловларда 76 фоиз овоз олди ва Эроннинг биринчи президенти сифатида мамлакатни бошқарди. 1981 йил июнда Банисадрни мусулмонлар руҳиятига зид фаолият олиб борганликда айблаб, унга импичмент эълон қилишди ва президентни бошқарувдан четлатиш мақсадида норозилик намойишлари уюштирилди. У «президентлик курсисидан қулади». Шундан кейин Банисадр яна Францияга кетди. У бир неча марта Эрон ҳукуматининг сиёсатини танқид қилган ва амалдорларни зўравонлик ҳамда қонунларга зид иш кўриш, уларга бўйсунмасликда айблаган.
Эслатиб ўтамиз, сентябрь ойида Жазоирни 20 йил давомида бошқарган собиқ президент Абдулазиз Бутефлика вафот этган. Апрель ойида эса Чад давлатининг 30 йиллик президенти исёнчилар билан жангда ҳалок бўлган, шунингдек, АҚШ собиқ вице-президенти Уолтер Мондейл 93 ёшида вафот этганди.
Изоҳ (0)