YHXBB Qamchiqda tuman tushgani tufayli yo‘l ko‘rinuvchanligi darajasi pasayganidan ogohlantirdi

YHXBB Qamchiq dovonida 6-oktabr kuni tuman tushgani bois yo‘l ko‘rinuvchanligi darajasi pasayganini ma’lum qildi.

Shu sababli boshqarma dovon yo‘lidan harakatlanuvchi haydovchilarni ob-havo, tuman sharoiti va yo‘l namligini inobatga olib, tezlikni me’yoridan oshirmasdan, oraliq masofani saqlagan holda, e’tiborli va ehtiyotkor bo‘lib harakatlanishga chaqirdi.

Eslatib o‘tamiz, Qamchiq dovonida 5-oktabr kuni kechasi qor yog‘di. Shu sababli YHXBB barcha haydovchilardan qoidalarga rioya qilishlarini, dovon yo‘lidan harakatlanib o‘tuvchilardan esa o‘ta ehtiyotkor bo‘lishlarini so‘ragandi. YHXBB, shuningdek, O‘zbekistonda ob-havo keskin pasayishi kutilayotgani sabab haydovchilarga shinalar holatiga e’tiborli bo‘lishga ham chaqirgandi.

6-oktabr kuni avtomobil haydovchilari noqulay ob-havo sharoitini inobatga olmay, tezlikni oshirib haydashi oqibatida Qamchiq dovonida 4 ta mashina ishtirokida YTH yuz berdi.