Andijonda fuqaroga 200 ming dollar imtiyozli kredit olib berishni va’da qilib, undan pul talab qilgan shaxs ushlandi. Bu haqda Bosh prokuratura huzuridagi departament xabar berdi.
Ma’lum qilinishicha, Bosh prokuratura huzuridagi departament hamda DXXning Andijon viloyati boshqarmalari tomonidan tezkor tadbir o‘tkazilgan. Tadbir davomida O.K. ismli shaxs fuqaro O.ga o‘zini go‘yoki Ispaniya davlatida faoliyat yurituvchi bankning O‘zbekistondagi vakili sifatida tanishtirgani aniqlangan. O.K. ushbu fuqaro tadbirkorlik faoliyati uchun mazkur bankdan 200 ming dollar imtiyozli kredit ajratib berishi evaziga 6,3 ming dollar olgan vaqtida ashyoviy dalillar bilan ushlangan.
Shuningdek, tergovga qadar tekshiruvda O.K. muqaddam fuqarolar K. va Q.ning ham shu yo‘sinda 21,5 ming dollarni qo‘lga kiritgani ma’lum bo‘lgan.
Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Marg‘ilonda birga tadbirkorlik qilishni aytib, begona ayolning 200 million so‘mini qo‘lga kiritgan shaxsga jinoyat ishi qo‘zg‘atilgani, Xorazmda o‘qishga kiritib qo‘yishni va’da berib, fuqarolarning 700 million so‘mga yaqin mablag‘ini o‘zlashtirgan shaxslarga sud hukmi o‘qilgani to‘g‘risida xabar berilgandi.
Izoh (0)