6-oktabr kuni O‘zbekiston tashqi ishlar vaziri Abdulaziz Komilov Vatikanning O‘zbekistondagi apostol nunsiysi (elchisi) etib tayinlangan (qarorgohi Moskva shahrida) arxiyepiskop Jovanni d’Aniyelloni qabul qildi. Bu haqda vazirlikning rasmiy vakili xabar berdi.
Elchining ishonch yorliqlarini qabul qilib olgan Abdulaziz Komilov uni mas’ul lavozimga tayinlangani bilan tabriklagan. O‘zbekiston va Vatikan o‘rtasida turli millatlar va dinlar vakillari o‘rtasidagi do‘stlik hamda o‘zaro aloqalarni mustahkamlashga qaratilgan ijobiy hamkorlik tajribasi to‘plangani qayd etilgan.
“O‘zbekiston Vatikanni islom va xristianlik dinlari o‘rtasidagi muloqotni rivojlantirishda muhim hamkor deb biladi”, — deydi Abdulaziz Komilov.
Tomonlarning turli darajadagi konfessiyalararo muloqotni yanada mustahkamlash va faollashtirishga o‘zaro tayyorligi bildirilgan.
“Vatikan elchisiga O‘zbekistonda millatlararo totuvlik va diniy bag‘rikenglikni mustahkamlash, fuqarolarning diniy sohadagi huquq va erkinliklarini har tomonlama himoya qilish borasida olib borilayotgan ishlar haqida ma’lumot berildi”, — deyiladi xabarda.
Eslatib o‘tamiz, Pestum arxiyepiskopi Jovanni d’Aniyello O‘zbekistondagi yangi apostol nunsiysi etib 2021-yilning yanvarida tayinlangandi. 2020-yilning dekabrida O‘zbekiston elchisi Jahongir G‘aniyev Rim-katolik cherkovi rahbari Fransiskga ishonch yorlig‘i topshirgan edi.
Izoh (0)