Toshkentning Yashnobod tumanida 36 yoshli velosipedchi Lada urib yuborishi oqibatida vafot etdi. Bu haqda poytaxt IIBB matbuot xizmati xabar berdi.
Ma’lum qilinishicha, 5-oktabr kuni taxminan soat 21:00 da Yashnobod tumani Jarqo‘rg‘on ko‘chasida 23 yoshli haydovchi A.J. “Lada 11184” rusumli avtomobilni ishonchnoma asosida boshqarib ketayotganida kutilmaganda chapga burilgan velosipedchini urib yuborgan. 36 yoshli velosipedchi burilayotganda yo‘ldagi boshqa transport vositalari harakati ustuvorligini hisobga olmagan. Oqibatda u olgan og‘ir tan jarohatlaridan vafot etgan.
Holat yuzasidan Toshkent shahar IIBB Tergov boshqarmasi tomonida Jinoyat kodeksining 266-moddasi 2-qismi (transport vositalari harakati yoki ulardan foydalanish xavfsizligi qoidalarini buzish odam o‘limiga sabab bo‘lishi) bo‘yicha jinoyat ishi qo‘zg‘atildi. Tergov olib borilmoqda.
Avvalroq Toshkentning Yangihayot tumanida 4 nafar maktab o‘quvchisini Damas urib yuborgani haqida xabar berilgan edi. Ulardan biri shifoxonaga olib ketilayotganda vafot etgan.
Izoh (0)