AQSh vitse-prezidenti Kamala Xarris Vashingtondagi uyini 1,85 million dollarga sotdi. Bu haqda Forbes bitimdan xabardor manbasiga tayanib yozdi.
Vest-Endda joylashgan uyning maydoni 1730 kvadrat metr. Unda ikkita yotoqxona va ikkita yuvinish xonasi mavjud. Xarris va uning turmush o‘rtog‘i Dug Emxoff 2017-yil oktabr oyida bu mulkni 1,77 million dollarga sotib olgan. Ular uyni aprelda dastlab 1,995 million dollarga sotuvga qo‘ygandi. Iyulda narx 1,85 million dollarga tushirilgan. Xaridorning ismi noma’lum.
Bu Xarrisning vitse-prezidentlik davrida sotgan ikkinchi mulki. Mart oyida u San-Fransiskodagi kvartirasini 860 ming dollarga sotdi, uyni esa 2004-yilda 489 ming dollarga sotib olgandi.
Xarris AQSh vitse-prezidenti lavozimini egallagan birinchi afroamerikalik ayol, unga 2020-yilda AQSh prezidenti Jo Bayden ma’muriyatida ushbu vazifa yuklatildi. Bungacha Xarris Kaliforniya shtatining senatori, shuningdek, shtat bosh prokurori bo‘lgan. 2019-yilda u prezidentlik kampaniyasida ishtirok etishini e’lon qildi, lekin mablag‘ yetishmasligi sababli poygadan voz kechib, saylovning dastlabki bosqichidan yuqoriga chiqmadi.
2020-yilgi soliq deklaratsiyasiga ko‘ra, Xarris va Emxoff Bayden va uning rafiqasi Jillga qaraganda ko‘proq daromad olgan. Baydenlar juftligi 607 ming dollar daromad qilgan bo‘lsa, vitse-prezident Kamala Xarris va turmush o‘rtog‘ining daromadi qariyb 1,7 million dollarni tashkil etgan.
Izoh (0)