Tashqi dushman hujum qilgan taqdirda, Belarus Rossiya bilan “yagona harbiy baza”ni yaratadi. Bu haqda respublika prezidenti Aleksandr Lukashenko Amerikaning CNN telekanaliga bergan intervyusida aytib o‘tdi.
“Agar kerak bo‘lsa, Belarus sizning tajovuzingizga qarshi turish uchun Belarus va Rossiyaning yagona bazasiga aylanadi. Agar siz yoki qaysidir qo‘shni davlat to‘satdan shunday qaror qilmoqchi bo‘lsangiz, buni yaxshilab tushunib olishingiz kerak”, — dedi Lukashenko amerikalik jurnalistga.
Prezidentning so‘zlariga ko‘ra, nizo kelib chiqqan taqdirda, Belarusni “Rossiya qurolli kuchlarining butun g‘arbiy qismi” qo‘llab-quvvatlaydi. Uning ta’kidlashicha, g‘arbiy yo‘nalishda Rossiya va Belarus aslida yagona armiya yaratgan, uning asosini Belarus qo‘shinlari tashkil etadi. “Aslida, biz uzoq vaqtdan beri Belarus va Rossiya Ittifoqi davlatining old postimiz”, — dedi prezident.
Shu bilan birga, siyosatchining ta’kidlashicha, Belarusda xorijiy harbiy bazalar, jumladan Rossiya bazalari yo‘q. Lukashenko respublikada “fuqarolik maqsadlaridagi” ikkita baza borligini tasdiqladi. “Birinchisi, sizning hududingizdan yadroviy raketalar uchirilishini oldindan aniqlash uchun Sovet Ittifoqi davrida qurilgan bazadir. Ikkinchisi, Rossiya Qurolli Kuchlari o‘zining Atlantika okeanidagi floti bilan bog‘lanadigan aloqa bazasi ”, — dedi u.
Prezidentning so‘zlariga ko‘ra, mazkur bazalarda faqat bir-ikkita rossiyalik zobit xizmat qiladi, qolgan xodimlar belaruslik.
2015-yil sentabr oyida Rossiya prezidenti Vladimir Putin Belarusda Rossiya aviabazasini yaratish to‘g‘risidagi bitimni imzolashni buyurgandi. Belarusda bunga qarshi norozilik namoyishlari boshlanib ketdi, shundan so‘ng Lukashenko bu haqda hech qanday gap bo‘lmaganini aytib, Rossiya harbiy bazasini tuzishdan bosh tortdi.
CNN’ga bergan intervyusi davomida Lukashenko, agar Belarus ustidan xorijiy aviakompaniyalarning samolyotlari uchsa, ularning xavfsizligi kafolatlanishini aytdi. Shu bilan birga, u agar Belarus xavfsizligiga tahdid sezilsa, mamlakat hukumati har qanday reysni bo‘ysundirishi va qo‘ndirishini aytdi.
“Agar bizning hududimiz ustidan uchishdan qo‘rqsangiz, men shaxsan siz va sizning kompaniyangizga, mamlakatingizga va boshqa har qanday davlatga Belarus ustidan parvoz to‘liq xavfsiz bo‘lishiga kafolat beraman. Har doim shunday bo‘lgan. Ammo agar men va huquq-tartibot organlari Belarus davlatiga tahdid ko‘rsak, har qanday samolyotni bu yerga qo‘ndiramiz. Agar biz xavfni sezsak, u Belarusda darhol qo‘lga olinadi”, — dedi prezident.
Lukashenkoning ta’kidlashicha, inqirozli vaziyatda boshqa davlatlar hukumati ham xuddi shunday yo‘l tutadi. Prezidentning so‘zlariga ko‘ra, Belarus mamlakat bo‘ylab uchishdan qo‘rqayotgan xorijiy kompaniyalarning reysi bo‘lmasa ham uddalaydi. Uning fikricha, Yevropa davlatlari “Vashington buyrug‘idan keyin” respublika ustidan uchishdan bosh tortdi.
Prezidentning qo‘shimcha qilishicha, Belarus maxsus xizmatlari Ryanair samolyoti bilan bog‘liq voqeada ishtirok etmagan. Siyosatchi bunday fikrni uydirma deb atadi.
“Agar siz aytgandek, bu bizning maxsus xizmatlar tomonidan rejalashtirilgan harakat bo‘lganda, siz oshirib yuboryapsiz. Chunki, maxsus xizmatlar tomonidan bunday operatsiyani amalga oshirish va hech qanday xalqaro qonunlarni, hatto ko‘rsatmalarni buzmaslik katta xarajat talab qiladi. Bizning maxsus xizmatlar, hatto sizniki ham bunga tayyor deb aytolmayman”, — dedi Lukashenko.
Eslatib o‘tamiz, 23-may kuni Belarus hukumati Ryanair aviakompaniyasining Afinadan Vilnyusga uchayotgan samolyotini shoshilinch ravishda Minskka qo‘nishga majbur qilgandi. Samolyot yo‘lovchilari orasida muxolifatchi va Nexta Telegram kanalining sobiq bosh muharriri Roman Protasevich ham bor edi. Protasevich va uning sevgilisi — Rossiya fuqarosi Sofya Sapega aeroportda qo‘lga olingan.
Izoh (0)