АҚШ вице-президенти Камала Харрис Вашингтондаги уйини 1,85 млн долларга сотди

АҚШ вице-президенти Камала Харрис Вашингтондаги уйини 1,85 миллион долларга сотди. Бу ҳақда Forbes битимдан хабардор манбасига таяниб ёзди.

Вест-Эндда жойлашган уйнинг майдони 1730 квадрат метр. Унда иккита ётоқхона ва иккита ювиниш хонаси мавжуд. Харрис ва унинг турмуш ўртоғи Дуг Эмхофф 2017 йил октябрь ойида бу мулкни 1,77 миллион долларга сотиб олган. Улар уйни апрелда дастлаб 1,995 миллион долларга сотувга қўйганди. Июлда нарх 1,85 миллион долларга туширилган. Харидорнинг исми номаълум.

Бу Харриснинг вице-президентлик даврида сотган иккинчи мулки. Март ойида у Сан-Францискодаги квартирасини 860 минг долларга сотди, уйни эса 2004 йилда 489 минг долларга сотиб олганди.

Харрис АҚШ вице-президенти лавозимини эгаллаган биринчи афроамерикалик аёл, унга 2020 йилда АҚШ президенти Жо Байден маъмуриятида ушбу вазифа юклатилди. Бунгача Харрис Калифорния штатининг сенатори, шунингдек, штат бош прокурори бўлган. 2019 йилда у президентлик кампаниясида иштирок этишини эълон қилди, лекин маблағ етишмаслиги сабабли пойгадан воз кечиб, сайловнинг дастлабки босқичидан юқорига чиқмади.

2020 йилги солиқ декларациясига кўра, Харрис ва Эмхофф  Байден ва унинг рафиқаси Жиллга қараганда кўпроқ даромад олган. Байденлар жуфтлиги 607 минг доллар даромад қилган бўлса, вице-президент Камала Харрис ва турмуш ўртоғининг даромади қарийб 1,7 миллион долларни ташкил этган.