Ukraina prezidenti Vladimir Zelenskiy Gruziyaning sobiq prezidenti, Ukraina fuqarosi Mixail Saakashvilining Tbilisida hibsga olingani haqidagi xabardan xavotirda ekanini bildirdi. Bu haqda Zelenskiyning matbuot kotibi Sergey Nikiforovga tayanib, “Interfaks” xabar bergan.
“Biz Ukraina islohotlar milliy kengashi ijroiya qo‘mitasi raisi Mixail Saakashvilining hibsga olingani haqidagi xabarlarni diqqat bilan kuzatmoqdamiz. Prezident Vladimir Zelenskiy Gruziyadagi vaziyatning qay tarzda rivojlanishi haqida yangrayotgan xabarlar va bayonotlar ohangidan xavotirda ”, — deb yozdi Nikiforov Facebook’da.
“Ukraina Gruziya tomoniga murojaat qilib, Ukraina fuqarosiga nisbatan bunday qadam qo‘yilishning barcha holati va sabablarini tushuntirib berishni so‘raydi”, — deya qo‘shimcha qildi u.
Nikiforovning so‘zlariga ko‘ra, Ukrainaning Gruziyadagi elchixonasiga hozircha Saakashvilining hibsga olingani haqida rasmiy ma’lumot kelmagan, biroq konsullar unga zarur yordam ko‘rsatishni allaqachon o‘z zimmasiga olgan.
Ukraina Oliy Radasidagi “Xalq xizmatkori” fraksiyasi rahbari David Araxamiyaning fikricha, Tbilisida Saakashvilining hibsga olingani jiddiy diplomatik nizoga sabab bo‘lishi mumkin.
“Menimcha, bu jiddiy diplomatik nizoga sabab bo‘ladi, chunki u Ukraina fuqarosi va ularning Saakashvilini asossiz hibsga olishga haqqi yo‘q. Fikrimcha, dam olish kunlari o‘tgach, bu vaziyat xalqaro miqyosda, albatta, tahlil qilinadi. Bizning Gruziya bilan do‘stlik guruhimiz bor va parlamentlararo darajada ham bu masalani hal qilish kerak, deb hisoblayman”, — degan Araxamiya.
Gruziyaning amaldagi prezidenti Salome Zurabishvilining ma’lum qilishicha, Saakashvili afv etilmaydi.
“Qonun oldida hamma teng. Ko‘p odamlar Saakashviliga prezident rahm-shafqat ko‘rsatadimi, deb so‘ramoqda, javob bitta. Oddiy va uzil-kesil — yo‘q, hech qachon”, — dedi Zurabishvili xonim brifingda.
Avvalroq u Saakashvilining Gruziyaga tashrifi haqida yozma bayonot berib, uning qaytishi “mavzusini takrorlaganlar” mamlakatdagi vaziyatni beqarorlashtirayotganini ta’kidlagandi.
Gruziya prokurori Jarji Tsiklauri ham Saakashviliga nisbatan chiqarilgan hukm ustidan shikoyat qabul qilinmasligini aytdi. “Mixail Saakashvili Valeriy Gelashvilini kaltaklash va Sandro Girgvlianini o‘ldirish jinoyatlari bo‘yicha uchta sud hukmi bilan aybdor deb topilgan. Jazo sifatida u olti yilga ozodlikdan mahrum etilgan. Mazkur ishlar yuzasidan sud qarorlari yakuniy va shikoyat qilinmaydi ”, — dedi u.
1-oktabr kuni Saakashvili Gruziyaga kelganini ma’lum qildi. Uni hibsga olishni va’da qilgan Gruziya hukumati avvaliga sobiq prezidentning mamlakatga qaytganini rasman tasdiqlamagandi. Keyinroq mamlakat bosh vaziri sobiq prezidentning hibsga olinganini e’lon qildi.
Saakashvili hibsga olinganidan so‘ng, ijtimoiy tarmoqlarda u Ukraina Oliy Radasining “Xalq xizmatkori” partiyasi deputati Yelizaveta Yasko bilan oila qurishga qaror qilgani haqida videoxabar paydo bo‘ldi. Juftlik ishtirokidagi video ham Yasko, ham Saakashvilining akkauntlarida e’lon qilingan. Video oldindan yozib olingan va Saakashvili hibsga olingan taqdirda ular buni internetga joylashtirishga kelishib olgan. Ayni paytda videomurojaat ijtimoiy tarmoqlarda tarqatilgan.
“Biz bu videoni Gruziyaga jo‘nab ketishdan oldin tasvirga oldik. U Gruziya va Ukraina birga ekani haqida. Biz hibsga olish yuz bergan taqdirda bu videoni chiqarishga kelishib oldik. Men va Liza birgamiz. Ukraina Gruziyani qo‘llab-quvvatlaydi! Hammasi yaxshi bo‘ladi! Kurash erkinlik uchun”, — deya videoga izoh bergan Saakashvili.
1-oktabr kuni Saakashvilining rafiqasi Sandra Elisabet Rulofs ijtimoiy tarmoqlarda turmush o‘rtog‘i o‘z va’dasini bajarib, Gruziyaga qaytgani haqida yozdi. U mazkur harakatni “qahramonlik va zukkolik” deb atadi va muxolifat tarafdorlarini 2-oktabr kuni bo‘lib o‘tadigan mahalliy saylovlarda ovoz berishga chaqirdi.
“Yagona milliy harakat” (YMH) partiyasining norasmiy rahbari Saakashvili 2-oktabr kuni bo‘lib o‘tadigan saylovlarda agar hukmron “Gruziya orzusi” partiyasi 43 foizdan kam ovoz to‘plasa, buni muddatidan oldin parlament saylovini tayinlashga asos bo‘ladigan referundum deb hisoblashini aytgan.
Ushbu shart 2021-yilning bahorida Yevropa kengashi rahbari Sharl Mishelning vositachiligi bilan hukmron partiya va muxolifat vakillari o‘rtasida imzolangan Siyosiy inqirozni bartaraf etish to‘g‘risidagi bitimga kiritilgan edi.
YMH shartnomani imzolashdan uzoq vaqt bosh tortdi. Birlashgan Millatlar Tashkilotining pozitsiyasi tufayli, iyul oyi oxirida “Gruziya orzusi” shartnomadan chiqdi va hukmron partiya munitsipalitet saylovlarida 43 foiz ovoz to‘play olmagan taqdirda, muddatidan oldin parlament saylovini tayinlash sharti o‘z kuchini yo‘qotganini bildirdi. Sentabr oyi boshida YMH shartnomani imzolayotganini e’lon qildi. Shunga qaramay, “Gruziya orzusi” ular bu masalaga qaytish niyatida emaslgini, kelishuv endi haqiqiy hisoblanmasligi va muddatidan oldin parlament saylovlari belgilanmasligini qayd etdi.
Izoh (0)