Eron o‘zining yadroviy dasturi bo‘yicha Qo‘shma harakatlar rejasiga qaytish to‘g‘risida qaror qabul qilishi kerak, ammo AQSh uni uzoq kutmaydi. Bu haqda AQSh Davlat kotibi Entoni Blinken Pittsburgda AQSh va Yevropa Ittifoqi tomonidan tuzilgan Savdo va texnologiyalar bo‘yicha kengash yig‘ilishida qatnashgan jurnalistlarga aytib o‘tdi.
“Ular (eronliklar) uch oydan buyon muzokara o‘tkazmadi. Ularda saylovlar bo‘lib o‘tdi, yangi hukumat tuzildi, lekin ular muzokaralarni davom ettirmadi. Demak, haligacha qaror qabul qilinmagan va to‘p ular tomonda qolmoqda, lekin bu uzoq davom etmaydi ”, — dedi Blinken.
Davlat kotibining tushuntirishicha, agar Eron o‘z yadroviy dasturini muzokaralarsiz davom ettirsa, shunday lahza keladiki, “yadroviy bitimga odatiy yo‘l bilan qaytish ma’lum bir bosqichda yetarli bo‘lmay qoladi”.
Aprel oyidan buyon Vena shahrida Eron va xalqaro “beshlik” (Rossiya, Buyuk Britaniya, Germaniya, Xitoy va Fransiya) o‘rtasida Eron yadroviy bitimini asl shaklida tiklash bo‘yicha muzokaralar olib borilmoqda. Tomonlar Amerikaning Islom Respublikasiga qo‘ygan sanksiyalarini bekor qilish, yadroviy sohadagi majburiyatlarini bajarish, shuningdek, AQShning bitimga qaytishini muhokama qilmoqda.
Shartnomaga a’zo davlatlar vakillari, shuningdek, Eron ishtirokisiz Amerika elchilari bilan alohida maslahatlashuvlar o‘tkazmoqda. Dastlab, delegatsiyalar ishni may oyining oxirida, keyin iyun oyining boshida yakunlashga umid bildirgandi. 21-sentabr kuni Eron Tashqi ishlar vazirligi matbuot kotibi Said Xatibzodaning aytishicha, yadroviy bitimni to‘liq qayta tiklash bo‘yicha muzokaralar bir necha hafta ichida Venada qayta boshlanadi.
Izoh (0)