Kanadaning Toronto shahri va uning atrofida yashaydigan uyg‘ur turklari tarixiy cherkovni sotib olib, uni masjidga aylantirdi. Bu haqda Anadolu Agency xabar berdi.
1873-yilda qurilgan “Maunt Karmel” cherkovi masjidga aylantirilgach, Kanadadagi uyg‘ur turklarining Islom va madaniyat markazi deb nomlandi.
Kanadadagi Uyg‘ur turklari uyushmasi bosh kotibi Itibar Artish Anadolu’ga bergan intervyusida aytishicha, cherkov nafaqat masjid, balki jamoat markazi sifatida ham ishlaydi. Toronto va uning atrofida yashovchi uyg‘ur turklari uzoq vaqtdan beri ibodat qilish va ijtimoiy tadbirlar o‘tkazish markaziga muhtoj edi, deydi u.
“Bu yerda biz bir vaqtning o‘zida ham namoz o‘qiymiz, ham farzandlarimizga Qur’onni o‘rgatamiz. Bizga yangi avlodning G‘arb madaniyatiga singib ketishiga yo‘l qo‘ymaslik, aksincha, ularni Sharqiy Turkistonning boy an’analari, urf-odatlari va madaniyati bilan tanishtirish uchun shunday joy kerak edi ”, — deydi u.
“Maunt Karmel” cherkovining so‘nggi ruhoniysi Robin Uilki ham ochilish marosimiga tashrif buyurdi. U ko‘p yillar davomida ibodat joyi bo‘lgan ushbu bino bugun yana imonlilarni, ular hatto boshqa din vakillari bo‘lsa ham, qabul qilayotganidan xursand.
Uilki Xitoyning uyg‘ur turklariga qarshi olib borayotgan bosimi va qirg‘inlik siyosatini nomaqbul deb atadi. “Eshitishimcha, bolalar o‘z oilalaridan majburan ajratib olinib, internatlarga yuborilmoqda”, — dedi u. Rasmiy marosimdan so‘ng mehmonlarga uyg‘ur milliy taomlari tortildi. Cherkov binosi 610 ming Kanada dollariga (482 ming AQSh dollari) sotib olingan, masjid tez orada ibodat uchun ochiladi.
Izoh (0)