Yaponiya hukumati uch yillik kiberxavfsizlik strategiyasi loyihasini ma’qulladi, unda birinchi marta Rossiya, Xitoy va Shimoliy Koreya xakerlik hujumlarining potensial manbalari deb ataldi.
Hujjatda aytilishicha, bu uch mamlakat dushmanlarcha uyushtirilgan kiberhujumlarga aloqadorlikda gumon qilinmoqda. Shuningdek, Yaponiya “barcha samarali vositalar va imkoniyatlardan foydalangan holda qattiq choralar ko‘radi”. Bular jumladan, kibertahdidlarga javoban diplomatik choralar va jinoiy ta’qiblarni o‘z ichiga oladi.
Yaponiyalik mutaxassislarning fikricha, kibermakondagi tahdidlar so‘nggi paytlarda faqat ortib bormoqda.
Yaponiya, shuningdek, QUAD alyansi doirasida o‘z sheriklari — AQSh, Avstraliya va Hindiston bilan, shuningdek, Hind-Tinch okeanining erkin va ochiq realizatsiyasi uchun Janubi-Sharqiy Osiyo davlatlari assotsiatsiyasi bilan kiberxavfsizlik sohasidagi hamkorlikni kuchaytirmoqchi.
Iqtisodiy faoliyat bilan bog‘liq xavflarni bartaraf etish nuqtayi nazaridan, strategiyada suvosti kabellari kabi muhim infratuzilmani ishonchli himoya qilishni ta’minlash va AT-qurilmalari uchun yangi xavfsizlik va ishonchlilik standartlarini yaratish zarurligi qayd etilgan.
Avvalroq QUAD mamlakatlari rahbarlari kiberxavfsizlik sohasida hamkorlik qilishga kelishib olgandi. “Bugun biz kibermakonda yangi hamkorlikni boshlaymiz va kibertahdidlarga qarshi kurashish, barqarorlikni oshirish va muhim infratuzilmamizni himoya qilish uchun birgalikda ishlash majburiyatini olamiz”, — deyiladi Oq uy matbuot xizmati xabarida.
Aprel oyida AQSh razvedkasi Rossiyani kibermaydondagi eng asosiy tahdid deb atagandi. Avval Rossiya G‘arb davlatlarining kiberhujumlar haqidagi bayonot va e’tirozlarini keskin rad etgan.
Izoh (0)