Канаданинг Торонто шаҳри ва унинг атрофида яшайдиган уйғур турклари тарихий черковни сотиб олиб, уни масжидга айлантирди. Бу ҳақда Anadolu Agency хабар берди.
1873 йилда қурилган «Маунт Кармел» черкови масжидга айлантирилгач, Канададаги уйғур туркларининг Ислом ва маданият маркази деб номланди.
Канададаги Уйғур турклари уюшмаси бош котиби Итибар Артиш Anadolu’га берган интервьюсида айтишича, черков нафақат масжид, балки жамоат маркази сифатида ҳам ишлайди. Торонто ва унинг атрофида яшовчи уйғур турклари узоқ вақтдан бери ибодат қилиш ва ижтимоий тадбирлар ўтказиш марказига муҳтож эди, дейди у.
«Бу ерда биз бир вақтнинг ўзида ҳам намоз ўқиймиз, ҳам фарзандларимизга Қуръонни ўргатамиз. Бизга янги авлоднинг Ғарб маданиятига сингиб кетишига йўл қўймаслик, аксинча, уларни Шарқий Туркистоннинг бой анъаналари, урф-одатлари ва маданияти билан таништириш учун шундай жой керак эди », — дейди у.
«Маунт Кармел» черковининг сўнгги руҳонийси Робин Уилки ҳам очилиш маросимига ташриф буюрди. У кўп йиллар давомида ибодат жойи бўлган ушбу бино бугун яна имонлиларни, улар ҳатто бошқа дин вакиллари бўлса ҳам, қабул қилаётганидан хурсанд.
Уилки Хитойнинг уйғур туркларига қарши олиб бораётган босими ва қирғинлик сиёсатини номақбул деб атади. «Эшитишимча, болалар ўз оилаларидан мажбуран ажратиб олиниб, интернатларга юборилмоқда», — деди у. Расмий маросимдан сўнг меҳмонларга уйғур миллий таомлари тортилди. Черков биноси 610 минг Канада долларига (482 минг АҚШ доллари) сотиб олинган, масжид тез орада ибодат учун очилади.
Изоҳ (0)