Islandiyada Yevropada ilk bor ayollar parlamentdagi o‘rinlarning yarmidan ko‘pini qo‘lga kiritgandi. Ovozlar qayta sanab chiqilgach, ko‘pchilik o‘rin erkaklarda qoldi

Islandiyada bo‘lib o‘tgan parlament saylovlarining dastlabki natijalariga ko‘ra, Yevropada birinchi bo‘lib ushbu mamlakat parlamentida ayollar ko‘pchilik o‘rinni qo‘lga kiritgan edi. Biroq qayta sanash natijasida mandatlarning aksariyati oxir-oqibat erkaklarga o‘tishi ma’lum bo‘ldi.

Dastlabki natijalarga ko‘ra, ayollar bir palatali parlamentdagi 63 ta o‘rindan 33 tasini egallagan. Biroq Shimoli-g‘arbiy saylov okrugidagi Piratlar va Uyg‘onish partiyalari to‘plagan ovozlar orasida farq juda kichik bo‘lgani uchun saylov komissiyasi ovozlarni qayta sanadi, bu esa beshta mandatni qayta taqsimlashga olib keldi. Natijada ayollar parlamentda faqat 30 ta o‘ringa ega bo‘ldi.

Parlamentning oldingi chaqirig‘ida ayollar 24 o‘ringa egalik qilardi. Islandiya 30 nafar ayol deputat bilan ayollarning parlamentdagi o‘rni bo‘yicha Yevropada yetakchiga aylandi — ayollarning 48 foiz ulushi bilan mamlakat Shvetsiya (47 foiz) va Finlyandiyani (46 foiz) ortda qoldiradi.

Islandiya gender tengligi bo‘yicha dunyodagi eng ilg‘or mamlakat hisoblanadi, u 12 yil ketma-ket Jahon iqtisodiy forumining tegishli reytingida birinchi o‘rinni egallab kelmoqda. 1961-yilda mamlakat erkaklar va ayollar uchun mehnatga teng haq to‘lashni kafolatlaydigan dunyodagi birinchi qonunni qabul qildi. 1980-yilda Islandiya prezidenti etib ayol kishi saylandi — bu jahon tarixida birinchi shunday hodisa.

Hozir dunyoda parlamentida erkaklardan ko‘ra ayollari ko‘p bo‘lgan uchta mamlakat bor — Ruanda, Kuba va Nikaragua. Meksika va Birlashgan Arab Amirliklarida erkaklar va ayollar teng vakillik qiladi. O‘rta hisobda, ayollar butun dunyo bo‘ylab parlament deputatlarining to‘rtdan bir qismini tashkil qiladi.

Islandiyadagi saylov natijalari saylov komissiyasi rasmiy saytida hozircha e’lon qilinmagan, ular hali o‘zgarishi ham mumkin. 26-sentabr oqshomida “Yashil so‘llar” harakati komissiyaga Janubiy saylov okrugidagi ovozlarni qayta sanashni talab qilgan rasmiy so‘rov yubordi — “Yashil so‘llar” harakati va Markaziy partiyasi nomzodlari orasidagi farq faqat bir nechta ovozni tashkil qilgan.