Jurnalistika va ommaviy kommunikatsiyalar universitetida 23-sentabrdan boshlab xodimlar va talabalar uchun emlash punkti tashkil etildi. Bu haqda “Daryo” muxbiri xabar bermoqda.
Universitetning sirtqi bo‘lim boshlig‘i Nuriddin Jabiyevning aytishicha, talaba va magistrlar o‘rtasida vaksina bilan emlangani bo‘yicha so‘rovnoma o‘tkazilgan. Aksariyat talabalar vaksinaning birinchi dozasini olgani, ikkinchi dozasini olish uchun viloyatiga bormoqchiligini bildirgan. Qolganlari esa emlanmoqchi ekanligini yozgan.
Shu sababli universitet rahbariyati koronavirusdan himoya qilish va talabalarning viloyatga borib-kelish ovoragarchiliklarining oldini olish maqsadida o‘quv binosida emlash punktini tashkil etgan.
“Universitetimizda 2000 dan ortiq talaba va magistrlar o‘qiydi. 200 nafardan ortiq professor, o‘qituvchilar faoliyat yuritadi. Bir hafta oldin o‘tkazilgan so‘rovnomaga ko‘ra, vaksina olmagan, ikkinchi va uchinchi dozasini olish muddati yaqinlashgan talabalar va o‘qituvchilarning ro‘yxatini tuzib, 50 va 53-oilaviy poliklinikalariga buyurtma berdik. Masalan, o‘zim ham o‘zbek—xitoy vaksinasining ikkita dozasini olganman. Lekin uchinchi dozasini poliklinikaga borib olishga vaqtim bo‘lmayotgan edi. Mana shu bahonada men ham emlanaman”, — deydi O‘zJOKU sirtqi bo‘lim boshlig‘i Nuriddin Jabiyev.
Universitetda talabalar va xodimlar xohishiga ko‘ra Pfizer, AstraZeneca va o‘zbek—xitoy vaksinalari bilan emlanishlari mumkin.
50-oilaviy poliklinikaning imminolog shifokori Saliyeva Umidaning ta’kidlashicha, 23-sentabr kuni tushlikkacha 100 ga yaqin talabalarning dastlab tana harorati va qon bosimi o‘lchangan. Kasalliklari so‘ralgan. Tekshiruvlar natijasida 90 nafar odamga vaksina qilingan. Qolgan 10 nafariga tibbiy sabablarga ko‘ra cheklov qo‘yilgan.
“Hozir bir talabaning sog‘lig‘ini tekshirganimizda unda shamollash belgisi bor edi. Unga davo muolajasini yozib, besh kundan keyin emlanishini tavsiya qildim. O‘z viloyatida emlanib kelgan talabalarning muddatiga qarab, ikkinchi va uchinchi dozalarini ham qilyapmiz. Ular ertaga xodimlarimiz tomonidan vaksina olganlar bazasiga kiritilganidan so‘ng sayt orqali bemalol sertifikatlarini olishlari mumkin”, — dedi u.
23-sentabr soat 08:00 dan boshlab yo‘lga qo‘yilgan emlash punktida emlash jarayoni vaksina oluvchilarning talabiga qarab davom etadi.
“Asli Andijon shahridanman. Vaksina olmoqchi edim, lekin 20 yoshdan yuqorilarni emlaymiz deb rad qilishgandi. Hozir universitetimizning o‘zida 18 ga to‘lgan talabalarga ham vaksina qilayotganlarini eshitib keldim”, — deydi universitetning jamoatchilik bilan aloqalar yo‘nalishining 1-bosqichida tahsil oluvchi navbatini kutib turgan qiz.
O‘zJOKUdagi emlash punktida koronavirusga qarshi vaksinaning birinchi dozasini olganlarga 21—28 kun o‘tib, vaksinaning ikkinchi dozasini olish uchun qayta vaksinatsiya jarayoni tashkil etiladi.
Eslatib o‘tamiz, 1-noyabrgacha vaksinaning barcha dozalari bilan emlangan to‘lov shartnoma asosida o‘qiydigan talabalarga 10 foizlik chegirma beriladi.
Izoh (0)