Andijon viloyatining barcha shahar va tumanlarida yil oxiriga qadar kun-u tun ishlaydigan savdo va xizmatlar uchun bittadan maxsus ko‘chalar tashkil etiladi. Bu haqda “Daryo” muxbiri Umidjon Mamarasulov xabar bermoqda.
Viloyat hokimligi axborot xizmatining ma’lum qilishicha, davlat rahbarining 2021-yil maydagi “Xizmatlar sohasini jadal rivojlantirish chora-tadbirlari to‘g‘risida”gi qarori ijrosini ta’minlash maqsadida barcha shahar va tumanlar markazlarida yil oxiriga qadar bittadan savdo va ko‘ngilochar hududlar tashkil etilishi belgilangan. Viloyatda mana shunday ko‘ngilochar, savdo va xizmat ko‘rsatishga ixtisoslashgan yirik maskan Andijon shahridagi Bobur shohko‘chasining dastlabki 400 metr qismi — “Yangi bozor” dehqon bozori hududi atrofida tashkil etiladi.Buning uchun jami 53 milliard so‘mlik 129 ta loyiha shakllantirilgan. Mazkur ko‘chada salqin ichimliklar, milliy hunarmandchilik savdo majmuasi, velosiped ijara xizmati, shirinliklar, muzqaymoq do‘koni, umumiy ovqatlanish shoxobchasi va bolalar attraksionlari tashkil etiladi. Loyihalar ishga tushishi natijasida 1 ming 450 ta yangi ish o‘rni yaratilishi mumkin.
Avvalroq, 2021-yilning 22-aprel kuni Prezident Shavkat Mirziyoyev raisligida hududlarda xizmat ko‘rsatish sohasi yo‘nalishlarini rivojlantirish masalalari bo‘yicha o‘tkazilgan videoselektor yig‘ilishida shahar hamda aholisi 150 mingdan ko‘p bo‘lgan tuman markazlarida savdo va xizmatlar uchun maxsus ko‘chalar tashkil etilishi belgilanganligi, ularda 100 mingta tadbirkorlik subyektini joylashtirish imkoni mavjudligi bildirilgandi. Shuningdek, savdo va xizmat ko‘rsatish obyektlarining 24 soat mobaynida tun-u kun faoliyat yuritishiga doir jamoat xavfsizligi bo‘yicha soddalashtirilgan talablar o‘rnatilishi ma’lum qilingandi.
Izoh (0)