Andijon viloyatining Xonobod shahridagi “Kampirrovot” mahallasi hududi, Andijon suv ombori atrofidagi 68 gektar yer maydonida sun’iy ko‘l havzasi tashkil etiladi. Bu haqda “Daryo” muxbiri Umidjon Mamarasulov xabar bermoqda.
Ta’kidlanishicha, Prezident Shavkat Mirziyoyev 2020-yilda Andijon viloyatiga tashrifi davomida ichki turizmni rivojlantirish, xususan, Xonobod shahrini turizm markaziga aylantirish bo‘yicha ko‘rsatma bergan. Ushbu topshiriq ijrosini amalga oshirish maqsadida bir yil davomida shahar hududida o‘rganishlar olib borilgan. Natijada Andijon suv ombori atrofi — shaharning “Kampirrovot” mahallasi hududida sun’iy ko‘l havzasi hamda turli dam olish maskanlarini qurish bo‘yicha loyiha tayyorlangan.
Loyiha qiymati 50 milliard so‘mga yaqin bo‘lib, ushbu mablag‘larga sun’iy ko‘l havzasini va uning atrofida avtomobil yo‘li, velo va piyodalar yo‘laklarini qurish-ta’mirlash ishlari, shuningdek, ichimlik suvi va oqova suvi quvurini qurish-ta’mirlash ishlarini amalga oshirish rejalashtirilgan. Shuningdek, ko‘l atrofida 300 ga yaqin yangi tadbirkorlik subyektlari, ovqatlanish joylari, ko‘ngilochar va boshqa xizmatlar ishga tushiriladi. Loyihani qurish ishlari 2021—2022-yillarga mo‘ljallangan.
Xonobod shahar hokimligining ma’lum qilishicha, ayni paytda ushbu loyihani amalga oshirish bo‘yicha turkiyalik loyihachilar va investorlar bilan muzokaralar olib borilmoqda.
Izoh (0)