Журналистика ва оммавий коммуникациялар университетида 23 сентябрдан бошлаб ходимлар ва талабалар учун эмлаш пункти ташкил этилди. Бу ҳақда «Дарё» мухбири хабар бермоқда.
Университетнинг сиртқи бўлим бошлиғи Нуриддин Жабиевнинг айтишича, талаба ва магистрлар ўртасида вакцина билан эмлангани бўйича сўровнома ўтказилган. Аксарият талабалар вакцинанинг биринчи дозасини олгани, иккинчи дозасини олиш учун вилоятига бормоқчилигини билдирган. Қолганлари эса эмланмоқчи эканлигини ёзган.
Шу сабабли университет раҳбарияти коронавирусдан ҳимоя қилиш ва талабаларнинг вилоятга бориб-келиш оворагарчиликларининг олдини олиш мақсадида ўқув биносида эмлаш пунктини ташкил этган.
«Университетимизда 2000 дан ортиқ талаба ва магистрлар ўқийди. 200 нафардан ортиқ профессор, ўқитувчилар фаолият юритади. Бир ҳафта олдин ўтказилган сўровномага кўра, вакцина олмаган, иккинчи ва учинчи дозасини олиш муддати яқинлашган талабалар ва ўқитувчиларнинг рўйхатини тузиб, 50 ва 53-оилавий поликлиникаларига буюртма бердик. Масалан, ўзим ҳам ўзбек—хитой вакцинасининг иккита дозасини олганман. Лекин учинчи дозасини поликлиникага бориб олишга вақтим бўлмаётган эди. Мана шу баҳонада мен ҳам эмланаман», — дейди ЎзЖОКУ сиртқи бўлим бошлиғи Нуриддин Жабиев.
Университетда талабалар ва ходимлар хоҳишига кўра Pfizer, AstraZeneca ва ўзбек—хитой вакциналари билан эмланишлари мумкин.
50-оилавий поликлиниканинг имминолог шифокори Салиева Умиданинг таъкидлашича, 23 сентябрь куни тушликкача 100 га яқин талабаларнинг дастлаб тана ҳарорати ва қон босими ўлчанган. Касалликлари сўралган. Текширувлар натижасида 90 нафар одамга вакцина қилинган. Қолган 10 нафарига тиббий сабабларга кўра чеклов қўйилган.
«Ҳозир бир талабанинг соғлиғини текширганимизда унда шамоллаш белгиси бор эди. Унга даво муолажасини ёзиб, беш кундан кейин эмланишини тавсия қилдим. Ўз вилоятида эмланиб келган талабаларнинг муддатига қараб, иккинчи ва учинчи дозаларини ҳам қиляпмиз. Улар эртага ходимларимиз томонидан вакцина олганлар базасига киритилганидан сўнг сайт орқали бемалол сертификатларини олишлари мумкин», — деди у.
23 сентябрь соат 08:00 дан бошлаб йўлга қўйилган эмлаш пунктида эмлаш жараёни вакцина олувчиларнинг талабига қараб давом этади.
«Асли Андижон шаҳриданман. Вакцина олмоқчи эдим, лекин 20 ёшдан юқориларни эмлаймиз деб рад қилишганди. Ҳозир университетимизнинг ўзида 18 га тўлган талабаларга ҳам вакцина қилаётганларини эшитиб келдим», — дейди университетнинг жамоатчилик билан алоқалар йўналишининг 1-босқичида таҳсил олувчи навбатини кутиб турган қиз.
ЎзЖОКУдаги эмлаш пунктида коронавирусга қарши вакцинанинг биринчи дозасини олганларга 21—28 кун ўтиб, вакцинанинг иккинчи дозасини олиш учун қайта вакцинация жараёни ташкил этилади.
Эслатиб ўтамиз, 1 ноябргача вакцинанинг барча дозалари билан эмланган тўлов шартнома асосида ўқийдиган талабаларга 10 фоизлик чегирма берилади.
Изоҳ (0)