Zelenskiy yordamchisiga suiqasd uyushtirilganidan xabar topgach, Nyu-Yorkdagi safarini yakunlab, ortga qaytishga qaror qildi

Ukraina prezidenti Vladimir Zelenskiyning so‘zlariga ko‘ra, uning birinchi yordamchisi Sergey Shefirga qilingan suiqasd ortida kim turganini aytish qiyin. Hozirda Nyu-Yorkda bo‘lib turgan Zelenskiy Birlashgan Millatlar Tashkiloti Bosh Assambleyasi sessiyasida so‘zga chiqqanidan so‘ng darhol Kievga qaytishini ma’lum qildi.

“BMT Bosh Assambleyasida so‘zga chiqqanimdan so‘ng men darhol poytaxtga (Kiyev) ketaman. Ochig‘ini aytganda, buning ortida kim turganini bilmayman. Hozircha. Bular qanday kuch, balki ichkidir, balki tashqi. Ammo men ularni kuch deb hisoblamayman, chunki o‘rmonda do‘stimning mashinasiga o‘q uzish bilan menga ‘salom’ yo‘llash — bu ojizlik”, — dedi Zelenskiy Shefirga qilingan suiqasddan keyingi maxsus murojaatida.

Ukraina prezidentining birinchi yordamchisi Sergey Shefirning ishonch bilan aytishicha, unga hujum qilganlar Vladimir Zelenskiyni qo‘rqitmoqchi.

“Men aniq bitta maqsadni ko‘ryapman — bu men emas, men bu yerda bilvosita prezidentning do‘stiman. Maqsad — prezident, uning ma’naviy va psixologik holati. Qo‘rqitishga urinish”, — dedi Shefir. Uning qo‘shimcha qilishicha, Zelenskiy “juda irodali odam” va “uni qo‘rqitolmaysiz”.

Ukraina politsiyasi ham prezidentga bosim o‘tkazishni hujumning ehtimoliy sabablaridan biri deb hisoblamoqda. “Ukraina Milliy politsiyasi uchta asosiy versiyani ko‘rib chiqmoqda — bular jabrlanuvchining davlat faoliyatiga aloqadorligi, mamlakatning yuqori rahbariyatiga bosim o‘tkazish va mamlakatimizdagi siyosiy vaziyatni beqarorlashtirish maqsadlari”, — dedi Milliy politsiya boshlig‘i Igor Klimenko. Uning ta’kidlashicha, hodisada xorijiy maxsus xizmatlarning ishtiroki istisno qilinmayapti.

22-sentabr kuni tongda Ukrainada noma’lum shaxslar Zelenskiyning birinchi yordamchisi Sergey Shefirga suiqasd uyushtirdi. Suiqasd Kiyev viloyatining Lesniki qishlog‘i yaqinida sodir etilgan. Shefir o‘tirgan mashinaga o‘ndan ortiq o‘q kelib teggan. Shefir jarohat olmagan, lekin haydovchi og‘ir jarohat olgan.

Ukraina bosh prokurori qasddan odam o‘ldirish moddasi bo‘yicha ish ochilganini aytdi.