Rossiyadagi muhojirlarga hujjatlarini rasmiylashtirish va ish qidirish imkonini beradigan mobil dasturni 2022-yilda ishga tushirish rejalashtirilgan. Bu haqda Rossiya bosh vaziri o‘rinbosari Aleksey Overchuk o‘z intervyusida ma’lum qildi.
Bu dastur yordamida kishilar Rossiyaga kirishda o‘zi uchun cheklovlar bor-yo‘qligini bilib oladi. Agar cheklovlar bo‘lmasa, u boshqa bir qator xizmatlardan foydalana oladi.
“Agar ilgari u Rossiyada yashagan va ishlagan bo‘lsa, unda SNILS (Shaxsiy hisob raqamining sug‘urta raqami) va IIN (Soliq to‘lovchining identifikatsiya raqami) bor bo‘lishi mumkin, agar yo‘q bo‘lsa, u uchun ushbu hujjatlar shakllantiriladi. Shundan so‘ng ish qidirish, ish beruvchiga murojaat qilish mumkin bo‘ladi”, — dedi Overchuk. U dastur yordamida ro‘yxatdan o‘tish ham mumkin bo‘lishini aytdi.
Shu bilan birga, ushbu dasturdagi barcha servislar ham davlat xizmatlari bilan bog‘liq bo‘lmaydi, deya davom etdi bosh vazir o‘rinbosari. “Katta ehtimol bilan bu raqamli davlat-xususiy sheriklik bo‘ladi ya’ni u orqali xususiy xizmatlar ham ko‘rsatiladi, masalan, tibbiy sug‘urta sotib olish yoki uy topish va ijaraga olish”, — dedi u.
Muhojirlar uchun mobil dastur ishlab chiqilishi haqida 2020-yilning iyun oyida ma’lum bo‘lgan. U ro‘yxatga olish va xabardor qilish uchun yagona axborot platformasi doirasida yaratilmoqda. “Kommersant” xabar berishicha, uni Raqamli rivojlanish, aloqa va ommaviy axborot vositalari vazirligi ishlab chiqmoqda. Ushu platforma doirasida xorijiy fuqarolar to‘g‘risidagi yagona ma’lumotlar bazasi yaratiladi va muhojirlar shaxsiy kabineti bo‘lgan mobil dastur orqali tizimdan foydalanishi mumkin bo‘ladi.
Ichki ishlar vazirligi, shuningdek, muhojirlar uchun bir qator yangiliklarni e’lon qildi. Ular Rossiyada qolish uchun bir dona hujjatni olishi kerak, shuningdek, mamlakatga kirganida ulardan “sodiqlik shartnomasi”ni imzolash talab qilinishi mumkin. Hujjatda Rossiyaga kirish-chiqish qoidalari, mamlakatda qolish va ishga joylashish, taqiq va cheklovlar haqida ma’lumot beriladi. Hujjatga imzo chekish bilan muhojir ushbu qoidalarni buzish oqibatlari haqida ogohlantirilganini tasdiqlaydi, deb tushuntiradi Ichki ishlar vazirligi.
Shuningdek, vazirlik Rossiyaga 90 kundan ortiq muddatga keladigan mehnat muhojirlari va boshqa chet elliklarga elektron tashuvchiga ega maxsus plastik kartalar berish haqida taklif kiritgan. Chipda barmoq izlari ham saqlanadi.
Izoh (0)