Украина президенти Владимир Зеленскийнинг сўзларига кўра, унинг биринчи ёрдамчиси Сергей Шефирга қилинган суиқасд ортида ким турганини айтиш қийин. Ҳозирда Нью-Йоркда бўлиб турган Зеленский Бирлашган Миллатлар Ташкилоти Бош Ассамблеяси сессиясида сўзга чиққанидан сўнг дарҳол Киэвга қайтишини маълум қилди.
«БМТ Бош Ассамблеясида сўзга чиққанимдан сўнг мен дарҳол пойтахтга (Киев) кетаман. Очиғини айтганда, бунинг ортида ким турганини билмайман. Ҳозирча. Булар қандай куч, балки ичкидир, балки ташқи. Аммо мен уларни куч деб ҳисобламайман, чунки ўрмонда дўстимнинг машинасига ўқ узиш билан менга ‘салом’ йўллаш — бу ожизлик», — деди Зеленский Шефирга қилинган суиқасддан кейинги махсус мурожаатида.
Украина президентининг биринчи ёрдамчиси Сергей Шефирнинг ишонч билан айтишича, унга ҳужум қилганлар Владимир Зеленскийни қўрқитмоқчи.
«Мен аниқ битта мақсадни кўряпман — бу мен эмас, мен бу ерда билвосита президентнинг дўстиман. Мақсад — президент, унинг маънавий ва психологик ҳолати. Қўрқитишга уриниш», — деди Шефир. Унинг қўшимча қилишича, Зеленский «жуда иродали одам» ва «уни қўрқитолмайсиз».
Украина полицияси ҳам президентга босим ўтказишни ҳужумнинг эҳтимолий сабабларидан бири деб ҳисобламоқда. «Украина Миллий полицияси учта асосий версияни кўриб чиқмоқда — булар жабрланувчининг давлат фаолиятига алоқадорлиги, мамлакатнинг юқори раҳбариятига босим ўтказиш ва мамлакатимиздаги сиёсий вазиятни беқарорлаштириш мақсадлари», — деди Миллий полиция бошлиғи Игорь Клименко. Унинг таъкидлашича, ҳодисада хорижий махсус хизматларнинг иштироки истисно қилинмаяпти.
22 сентябрь куни тонгда Украинада номаълум шахслар Зеленскийнинг биринчи ёрдамчиси Сергей Шефирга суиқасд уюштирди. Суиқасд Киев вилоятининг Лесники қишлоғи яқинида содир этилган. Шефир ўтирган машинага ўндан ортиқ ўқ келиб тегган. Шефир жароҳат олмаган, лекин ҳайдовчи оғир жароҳат олган.
Украина бош прокурори қасддан одам ўлдириш моддаси бўйича иш очилганини айтди.
Изоҳ (0)