Kobul aeroportiga kirishda o‘tkazish punktlaridan birining yonida otishma yuz berdi. Bu haqda Germaniya Qurolli kuchlari (bundesver) o‘z Twitter’ida ma’lum qildi.

Foto: AP Photo

Otishma mahalliy vaqt bilan ertalabki 04:00 (Toshkent vaqti bilan 04:30) atrofida sodir bo‘lgan. Unda bir tomondan “noma’lum hujumchilar”, ikkinchi tomondan esa Afg‘oniston xavfsizlik kuchlari jangchilari qatnashgan. Ulardan biri halok bo‘lgan, yana uch kishi yaralangan.

Otishmada Amerika va Germaniya harbiylari ham ishtirok etgan, ularning hech biri jabrlanmagan. Otishma sabablari va uni kim boshlagani noma’lum.

Afg‘oniston xavfsizlik kuchlari — hokimiyat tepasiga “Tolibon” kelguniga qadar Afg‘onistonni amerikaliklar ko‘magida boshqargan hukumatning qo‘shinlari.

15-avgust kuni “Tolibon” harakati jangarilari Afg‘onistonda hokimiyatni o‘z qo‘liga qaytarib olgach, mamlakatni tark etishning yagona yo‘li Kobul aeroporti bo‘lib qolmoqda. Uni NATO kuchlari qo‘riqlamoqda, u yerdan G‘arb mamlakatlari fuqarolari va ularga yordam bergan afg‘onlar evakuatsiya qilinmoqda.

Huquq himoyachilari hisob-kitoblariga ko‘ra, aeroport darvozasi oldida qariyb 10 ming kishi to‘plangan, ular chet elga uchib ketishga urinmoqda. Ularning ba’zilari evakuatsiya reyslarining shassilariga osilib olgan. Harbiy xizmatchilar olomonni tutib turish uchun ko‘zni yoshlantiruvchi gazdan foydalangan va havoga o‘q otgan.

“Tolibon” hokimiyatni egallab olganidan buyon o‘tgan bir hafta ichida Kobul aeroporti va uning atrofida tiqilinch va sarosima oqibatida kamida 20 kishi halok bo‘lgan.

Avvalroq Kobul aeroporti yaqin ikki kunga yopilishi, bu allaqachon uning hududida bo‘lib turgan odamlarni evakuatsiya qilish uchun kerakligi ma’lum qilingan edi. Tegishli qaror evakuatsiya ustidan nazorat olib borayotgan Amerika harbiylari tomonidan qabul qilingan.

Shuningdek, “Tolibon” jangarilari Kobul aeroportidagi evakuatsiya jarayoniga aralashishga uringan taqdirda, AQSh ularga tezda javob qaytarishi haqida ogohlantirgan edi.

“Tolibon” Kobul aeroportidagi evakuatsiya ishlariga aralashmaslikka va’da bergan. Ammo amerikaliklar va ularning ittifoqchilari bilan hamkorlik qilgan afg‘onistonliklar “Tolibon” ularning ketishiga to‘sqinlik qilishidan qo‘rqmoqda.

The New York Times xabariga ko‘ra, “Tolibon” so‘roq qilish va jazolash uchun AQSh harbiylari bilan hamkorlik qilgan afg‘onlarni qidira boshlagan. NYT ta’kidlashicha, “Tolibon” ro‘yxatdagi odamlarni, jumladan, Kobul aeroporti yaqinidan ham qidirmoqda, aeroport hozir mamlakatni tark etish mumkin bo‘lgan yagona joy.