Афғонистон пойтахти Кобулдаги халқаро аэропорт 20 сентябрь куни ички ва халқаро рейслар учун расман очилди. Бу ҳақда Афғонистон Ислом Амирлиги мамлакатининг Twitter’даги саҳифасида эълон қилинган баёнотга таяниб, «ТАСС» хабар берди.
«Кобул халқаро аэропорти ички ва халқаро тижорат рейслари учун расман очилди. Афғонистон фуқаро авиацияси маъмуриятининг қарорига кўра, ҳаво порти соат 06:00 дан 18:00 гача ишлайди», — дейилади хабарда.
Қайд этилишича, авиация маъмурияти Бирлашган Араб Амирликлари, Тожикистон, Ўзбекистон ва бошқа давлатлардан Кобулга парвозларни қайта тиклашни сўраган, аммо ҳозирча фақат Покистон ва Эрон ҳаво рейсларига розилик берган.
Афғонистонда фуқаролик рейслари учун ҳаво қатнови 15 августда «Толибон» жангарилари Кобулга жангсиз кирганидан кейин тўхтатилганди. Шундан сўнг бир вақтнинг ўзида бир нечта давлатлар 31 августга қадар ўз фуқаролари ва улар билан ҳамкорлик қилган афғонларни зудлик билан эвакуация қилди.
Кобул аэропортининг учиш-қўниш йўлаги ва терминаллари эвакуация чоғидаги тартибсизликлар ҳамда 26 августда аэропорт яқинида содир этилган терактдан жиддий шикастланган. Қайд этилишича, аэропорт 20 миллион доллар миқдорида зарар кўрган. Август ойининг охиридан буён Қатар ва Туркия техник ходимлари аэропортни ишга туширишга ёрдам бермоқда. 4 сентябрь куни Кобулдан биринчи самолётлар Афғонистоннинг Мозори-Шариф, Қандаҳор ва Ҳирот шаҳарларига учди. 9 сентябрь куни АҚШ Қуролли кучлари Афғонистондан чиқарилгандан буён биринчи самолёт Кобулдан Доҳага халқаро рейсни амалга оширди. Ўтган ҳафта Эрон ва Покистондан Кобулга биринчи тижорат чартер рейслари учди.
Изоҳ (0)