Xalq ta’limi vazirligi hech bir 1-sinf o‘quvchisi Prezident sovg‘asisiz qolmasligini ma’lum qildi

Xalq ta’limi vazirligiga ayrim hududlarda 1-sinf o‘quvchilariga Prezident sovg‘alari yoki uning tarkibidagi ayrim o‘quv qurollari yetib bormayotgani to‘g‘risidagi xabarlarga munosabat bildirdi.

Vazirlikning ma’lum qilishicha, pandemiya yangi o‘quv yili boshlanishining so‘nggi kunigacha ba’zi ota-onalar tomonidan farzandlarining hujjatlarini topshirish kechiktirgan, shu bilan birga, ba’zi yetkazib beruvchilarning kechikishiga ham olib kelgan. Bu esa o‘z-o‘zidan sovg‘alarni hisob-kitob qilishda va to‘liq qilib yetkazishda muammolarni yuzaga keltirgan.

Xalq ta’limi vazirligi ota-onalardan vaziyatni to‘g‘ri qabul qilishlarini va tez kunda sovg‘alar har bir bolaga yetib borishi ta’minlanishini ma’lum qiladi. Sovg‘alar ichidagi ba’zi yetmay qolgan o‘quv qurollari joyiga qaytadan yetkazilib, tarqatiladi.

“Bir hafta davomida mazkur holat to‘liq inventarizatsiya qilib chiqiladi, agar shundan so‘ng ham farzandingizga sovg‘a yoki darslik yetib bormasa Xalq ta’limi vazirligining 71 202 09 09 ishonch telefon raqamlari orqali murojaat qilishingiz so‘raladi”, — deyiladi xabarda.

Avvalroq 6-sentabr kuni O‘zbekistondagi 10 083 ta umumta’lim maktabida an’anaviy shaklda darslar boshlangani to‘g‘risida xabar berilgandi. Bu yil maktablarning 1-sinfiga 600 mingga yaqin bola qabul qilinib, ularga 12 turdagi o‘quv qurollari, maktab sumkasi, darsliklar majmuasidan iborat Prezident sovg‘alari topshirilgan.