Халқ таълими вазирлигига айрим ҳудудларда 1-синф ўқувчиларига Президент совғалари ёки унинг таркибидаги айрим ўқув қуроллари етиб бормаётгани тўғрисидаги хабарларга муносабат билдирди.
Вазирликнинг маълум қилишича, пандемия янги ўқув йили бошланишининг сўнгги кунигача баъзи ота-оналар томонидан фарзандларининг ҳужжатларини топшириш кечиктирган, шу билан бирга, баъзи етказиб берувчиларнинг кечикишига ҳам олиб келган. Бу эса ўз-ўзидан совғаларни ҳисоб-китоб қилишда ва тўлиқ қилиб етказишда муаммоларни юзага келтирган.
Халқ таълими вазирлиги ота-оналардан вазиятни тўғри қабул қилишларини ва тез кунда совғалар ҳар бир болага етиб бориши таъминланишини маълум қилади. Совғалар ичидаги баъзи етмай қолган ўқув қуроллари жойига қайтадан етказилиб, тарқатилади.
«Бир ҳафта давомида мазкур ҳолат тўлиқ инвентаризация қилиб чиқилади, агар шундан сўнг ҳам фарзандингизга совға ёки дарслик етиб бормаса Халқ таълими вазирлигининг 71 202 09 09 ишонч телефон рақамлари орқали мурожаат қилишингиз сўралади», — дейилади хабарда.
Аввалроқ 6 сентябрь куни Ўзбекистондаги 10 083 та умумтаълим мактабида анъанавий шаклда дарслар бошлангани тўғрисида хабар берилганди. Бу йил мактабларнинг 1-синфига 600 мингга яқин бола қабул қилиниб, уларга 12 турдаги ўқув қуроллари, мактаб сумкаси, дарсликлар мажмуасидан иборат Президент совғалари топширилган.
Изоҳ (0)