Olimlar o‘rtasida qizg‘in bahslarga sabab bo‘lgan yangi tadqiqot e’lon qilindi. Unda mol go‘shti va tovuq go‘shti hazm qilish tizimiga qanday ta’sir ko‘rsatishi hamda qaysi turdagi go‘sht foydaliroq ekanligi o‘rganildi.
Tadqiqot natijalariga ko‘ra, yog‘siz mol go‘shti tovuq go‘shtiga qaraganda kamroq salbiy ta’sir ko‘rsatishi aniqlandi. Garchi qizil (biroz xom pishirilgan) go‘sht, ko‘pincha ichak saratoni, yurak va qon-tomir kasalliklari xavfini oshiradi, deb hisoblanib kelinsa-da, bu galgi kuzatuvlar teskari natijalarni ko‘rsatdi. Bugungi kunga qadar esa tovuq sog‘liqqa eng zarar qilmaydigan go‘sht mahsuloti sifatida qaralardi.
Ispaniyalik mutaxassislar ushbu ikki turdagi go‘sht ichakdagi foydali va zararli bakteriyalar muvozanatiga qanday ta’sir ko‘rsatishini tahlil qildi. Eksperimentda 18–22 yoshdagi 16 nafar ko‘ngilli ishtirok etdi. Ular sakkiz hafta davomida har xil ovqatlanish rejimiga amal qilishdi. Natijada, ikkala parhez turi ichak mikrobiomida sezilarli o‘zgarishlarga olib kelgani ma’lum bo‘ldi.
Tovuqli parhezga amal qilganlar ichak tizimida foydali bakteriyalar soni kamaytirib, zararli mikroorganizmlar ko‘paygan. Va aksincha, mol go‘shti asosidagi parhezni tanlagan ishtirokchilarda ichak shilliq qavatini himoya qiluvchi bakteriyalar faollashgan. Bu esa me’da yallig‘lanishi va turli kasalliklarning oldini olishga yordam beruvchi muhim omil hisoblanadi.
Tadqiqot davomida birinchi guruh ishtirokchilari haftasiga uch marta vitaminlar va rux moddasiga boy mol go‘shti iste’mol qilgan bo‘lsa, ikkinchi guruh tovuq go‘shtiga tayanilgan parhezga amal qilgan. Har ikki holatda go‘sht qovurilgan, dimlab yoki pechda pishirilgan.
So‘ng tajriba yakunida ishtirokchilarning qon tahlillari olingan. Natijada tovuqli parhez organizmning glyukozani o‘zlashtirish qobiliyatini susaytirib, qondagi shakar miqdorining oshishiga sabab bo‘lishi aniqlangan. Shuningdek, tovuq go‘shtiga asoslangan ratsion tanadagi aminokislotalar ishlab chiqarilishini kamaytirgan. Bunday o‘zgarish immun tizimi va ichak salomatligi uchun muhim bo‘lgan oqsillarning yetishmasligiga olib keladi.
Tadqiqot mualliflari quyidagi xulosaga kelishdi: yog‘siz qizil go‘shtni, ayniqsa mol go‘shtini me’yorida iste’mol qilish (masalan, haftasiga uch mahal) nafaqat ichak mikrobiomini qo‘llab-quvvatlaydi, balki umumiy sog‘liqni ham yaxshilaydi.
Tadqiqotda berilgan haftasiga uch marta go‘sht iste’mol qilish tavsiyasi shifokorlar tomonidan ichak saratoni xavfini kamaytirish bo‘yicha beriladigan standart maslahatlarga to‘liq mos keladi.
Izoh (0)