Buxoroda kredit qarzdorligini to‘lashdan bo‘yin tovlab, yashirinib yurgan ayolning qidiruvdagi avtomashinasi topilib, jarima maydonchasiga joylashtirildi. Bu haqda “Daryo”ga MIB viloyat boshqarmasi mas’uli Akbar Latipov xabar berdi.
Ta’kidlanishicha, Kogon tumanida yashovchi fuqaro G.Sh. “Mikrokreditbank”dan notarial tartibda 11 million so‘m miqdorida mikroqarz olgan. Qarzdor olingan pul mablag‘i va foizlarini o‘z vaqtida qaytarmagach, bank tomonidan ogohlantirilgan.MIB inspektoriga ko‘ra, Vazirlar Mahkamasi qaroriga muvofiq, notarius pul olish, mulkni qaytarish yoki berish bilan bog‘liq notarial tasdiqlangan bitim shartlari bajarilmagan taqdirda qarzni so‘zsiz undirish haqida ijro xati chiqariladi va ushbu ijroni ta’minlash maqsadida Majburiy ijro byurosi organlariga yuboriladi. Shunga ko‘ra, qarzdor G.Sh. dan jami 15,2 million so‘m qarz undirishga kirishilgan. Va majburiy ijro harakatlari davomida qarzdor G.Sh.ning nomida bo‘lgan Cobalt rusumli avtoulov borligi aniqlangan.
Qidiruv jarayonida, G.Sh.ning nomida bo‘lgan ushbu mashina topilgan va jarima maydonchasiga olib kelingan. Hozirda qayd etilgan ushbu avtomashina narxi baholanib, “E-ijro auksion” elektron savdo maydonchasi orqali savdoga chiqarilgan.
Izoh (0)