O‘zbekiston Tashqi ishlar vazirligining rasmiy vakili “Tolibon” harakati Afg‘oniston hukumatining yangi tarkibini e’lon qilgani yuzasidan bayonot berdi.
Bayonotda ta’kidlanishicha, O‘zbekiston Afg‘onistonda muvaqqat hukumat tuzilganini olqishlaydi.
“Umid qilamizki, mazkur qaror mamlakatda keng ko‘lamli milliy kelishuvga erishilishi hamda mustahkam tinchlik va barqarorlik o‘rnatilishi tomon ilk qadam bo‘lib qoladi. Afg‘onistonning yangi davlat idoralari bilan konstruktiv muloqot va amaliy o‘zaro hamkorlikni rivojlantirishga tayyorligimizni bildiramiz”, — deb yozadi TIV rasmiy vakili.
Ma’lumotlarga ko‘ra, Muhammad Hasan Ohund “Tolibon” tuzgan yangi hukumatning rahbari bo‘ladi. Ohund “Tolibon” yetakchilarining rahbari hisoblanardi va avvalgi AQSh homiyligidagi hukumat qo‘shiniga qarshi urushda guruhni boshqargan. Qandahorlik yetakchi “Tolibon” asoschilaridan biri hisoblanadi.
Mulla Abdul G‘ani Barodar bosh vazir o‘rinbosari bo‘ladi, u “Tolibon”ning siyosiy qanotiga rahbarlik qilgan.
“Haqqoniy tarmog‘i” terrorchilik guruhi asoschisining o‘g‘li Sirojuddin Haqqoniy Ichki ishlar vaziri lavozimini egallaydi. “Tolibon” asoschilaridan birining o‘g‘li Umar Yoqub mudofaa vaziri bo‘ladi. Tashqi siyosiy idora (Tashqi ishlar vazirligi) rahbarligi Amir Xon Muttaqiyga ishonib topshiriladi. Razvedka vazirligiga Abdul Haq Vosiq rahbarlik qiladi. U 2002—2014-yillarda AQShda asirda bo‘lib qaytgan va Guantanamo qamoqxonasida jazo muddatini o‘tagan. Keyinchalik Abdul Haq Vosiqni “Haqqoniy tarmog‘i” guruhi asirga olgan AQSh harbiysiga almashtirishgan.
Izoh (0)