Nigeriyaning Zamfara shtatida qurollangan shaxslar tomonidan 50 dan ortiq odam o‘g‘irlab ketildi. Bu haqda BMT ma’lumotlariga tayanib, The Guardian xabar berdi.
Ta’kidlanishicha, 1-avgust kuni Zamfara shtatining Sabon Garin Damri qishlog‘iga qurolli shaxslar hujum qilgan. Ularning katta miqdorda tovon undirish maqsadida bu ishga qo‘l urgani taxmin qilinmoqda. Shtat politsiyasi ushbu holat bo‘yicha hali izoh bermagan.
Nigeriyada qurolli sahxslar tajovuzi dastlab chorvador va dehqonlar o‘rtasidagi suv va yer resurslari talashuvi fonida boshlangan bo‘lsa-da, bugunga kelib bu muammo keng ko‘lamli uyushgan jinoyatchilik darajasiga yetgan. Ayniqsa, davlat nazorati zaif bo‘lgan qishloq hududlaridagi aholi doimiy tahdid ostida qolmoqda.
Mutaxassislar fikricha, Zamfara shtatida ommaviy odam o‘g‘irlash holatlarining ko‘payayotgani ushbu jinoyatchilarning strategiyasida jiddiy o‘zgarish yuz berganini anglatadi. Iyul oyida ham xuddi shu kabi hodisa yuz bergan. O‘shanda garovdagilarning oila a’zolari jinoyatchilarga 33 700 AQSH dollari miqdorida tovon ham to‘lagan. Shunga qaramay, fevral oyida garovga olingan 33 kishi o‘ldirilgani ma’lum qilingan. Ularning orasida 3 nafar go‘dak ham asirlikda halok bo‘lgan.
2011-yildan buyon, mintaqada qurol savdosi kuchayib, Sahel hududida beqarorlik kuchaygani ortidan Nigeriyaning shimoli-g‘arbida qurolli guruhlar faoliyati avj olgan. Bu guruhlar chorva mollari va odam o‘g‘irlash hamda noqonuniy soliq yig‘ish orqali katta daromad topmoqda.
So‘nggi yillarda bu zo‘ravonliklar shimoli-g‘arbdan shimoliy-markaziy hududlarga ham tarqalmoqda. Ikki hafta oldin Niger shtatida o‘tkazilgan harbiy amaliyot davomida hukumat armiyasi 95 nafar qurollangan shaxsni yo‘q qilgandi. Biroq harbiylar resurs yetishmovchiligi va ortiqcha yuklama ostida ishlashga majbur bo‘lmoqda.
Moliyaviy manfaat izlayotgan qurolli shaxslar endilikda Nigeriyaning shimoli-sharqida 16 yildan beri faoliyat yuritayotgan ekstremistik guruhlar bilan ham hamkorlik qilmoqda. Jumladan, so‘nggi oylarda mamlakatning shimoli-g‘arbiy hududlarda “Lakurava” nomli yangi guruhning paydo bo‘lishi vaziyatni yanada og‘irlashtirgan.
Izoh (0)