Sirdaryo viloyati Boyovut tumani hokimining o‘rinbosari — mahalla va oilani qo‘llab-quvvatlash bo‘limi boshlig‘i Saodat Mirzayeva 51 yoshida vafot etdi. Bu haqda tuman hokimligi axborot xizmati tomonidan marhumaning yaqinlariga yo‘llagan ta’ziyanomasiga tayanib, “Sirdaryo xabarlari” ma’lum qildi.
Saodat Mirzayeva 1969-yil 11-noyabrda Boyovut tumanida tug‘ilgan. Mehnat faoliyati davomida maktabgacha ta’lim, umumiy o‘rta ta’lim maktablarida tarbiyachi, o‘qituvchi, maktab direktorining ma’naviy-ma’rifiy ishlar bo‘yicha o‘rinbosari lavozimlarida faoliyat yuritgan.
2020-yil 26-iyundan hozirgi vaqtgacha Boyovut tumani hokimining o‘rinbosari — mahalla va oilani qo‘llab-quvvatlash bo‘limi boshlig‘i lavozimida ishlab kelayotgan edi.
Hokimlik ta’ziyanomasida Saodat Mirzayevaning o‘limi bilan bog‘liq sabablar ochiqlanmagan. Nashrning ta’kidlashicha, marhuma so‘nggi kunlarda og‘ir dard bilan kurashib kelgan va davolanishda bo‘lgan.
Avvalroq Xo‘jaobod hokimining birinchi o‘rinbosari Ikrom Teshaboyev yurak xuruji va pnevmoniyadan, Yoshlar ishlari agentligi boshqarma boshlig‘i Mansurbek Masharipov 38 yoshida, Olmazor tumani hokimi Abdumajid Mullajonov 51 yoshida vafot etgani to‘g‘risida xabar berilgandi.
Izoh (0)