Jizzax viloyati G‘allaorol tumani tibbiyot birlashmasi jonlantirish bo‘limi katta hamshirasiga firibgarlik yuzasidan jinoyat ishi qo‘zg‘atilib, qo‘lga olindi. Bu haqda viloyat IIB matbuot xizmati xabar berdi.
Ma’lum bo‘lishicha, u o‘z xizmat mavqeyidan foydalangan holda, 2017–2020-yillar davomida shu bo‘limda unga bevosita bo‘ysunuvchi hamshira va farroshlarning ishlab, olayotgan maoshidan unumli foydalanish kerakligini aytib, ularning ishonuvchanligidan foydalanib, bankdan ular nomiga kredit rasmiylashtirgan.
Ayrimlariga rasmiylashtirilgan kredit mablag‘lariga kafil sifatida ishtirok etishini, ushbu taklifiga rozi bo‘lsa, navbatchilik kunlariga qo‘shimcha maosh, bayram kunlari esa rag‘batlar chiqarib berishini, kredit to‘lovlarini o‘zi to‘lashini, hech qanday muammo bo‘lmasligini, hujjatga imzo qo‘yib bersa, shuning o‘zi yetishini aytgan.
Shu tarzda yolg‘on va’dalar berib, 33 nafar hamshira va farroshning nomiga jami 695 million 140 ming so‘m kredit mablag‘i rasmiylashtirgan.
Keyinchalik qolgan kredit mablag‘larini to‘lolmasligini aytgan. Buning natijasida qarzdorlik sud va majburiy ijro orqali jabrlanuvchilardan undirilib, ularning oylik daromadidan ushlab qolingan.
Mazkur holat yuzasidan Jinoyat kodeksining 168-moddasi 4-qismi “a” bandi (juda ko‘p miqdorda firibgarlik) bilan jinoyat ishi qo‘zg‘atilib, katta hamshiraga qamoqqa olish tarzidagi ehtiyot chorasi qo‘llangan.
Mavzuga doir:
- Buxoroda og‘ir kasal ekanini aytib, fuqaro ishonchiga kirgan va uning plastik kartochkasidan salkam 1 mln so‘m yechib olgan qizga jinoyat ishi ochildi
- Samarqandda tibbiy komissiyadan o‘tkazib berish evaziga 600 dollar pora olgan shifokor qo‘lga olindi
- Samarqandda bemorlarga quyilgan qon uchun pul olgan shifokor sudlansa-da, jazodan qutulib qoldi
Izoh (0)