Turkmanistonda yuqumli kasalliklarning oldini olish maqsadida maktablarda o‘quv yilini boshlash 1-oktabrga qoldirildi. Shu bilan birga, mamlakatda COVID-19 yuqtirish holati rasman qayd etilmagan.
Ashxoboddagi bir qator maktablar o‘qituvchilarining ma’lum qilishicha, bugun, 1-sentabr kuni maktablarda faqat birinchi sinf o‘quvchilari uchun tantanali safda turish tadbirlari o‘tkazilgan.
O‘qituvchilar, shuningdek, ta’lim muassasalariga faqat birinchi sinfdan oltinchi sinfgacha bo‘lgan o‘quvchilar taklif etilganini xabar qildi. Ular shu haftaning oxirigacha o‘qiydi, so‘ng 1-oktabrga qadar ta’tilga ketadi. Yettinchi–o‘n birinchi sinf o‘quvchilari o‘qishni biryo‘la 1-oktabrdan boshlaydi.
Qayd etilishicha, mamlakatning o‘rta maxsus va oliy o‘quv yurtlari talabalariga o‘qish qachon boshlanishi haqida ularga keyinroq xabar beriladi.
Turkmaniston prezidenti Gurbanguli Berdimuhamedov mamlakatda koronavirus borligini haligacha inkor etmoqda, ammo avvalroq u epidemiologik xavfsizlikka javobgar vazirlarni ishdan bo‘shatgandi.
Mustaqil OAV xabarlariga ko‘ra, Turkmanistonda COVID-19 pandemiyasining navbatdagi avj olishi kuzatilmoqda. Ashxobodda bozorlar va kafelar qayta yopilgan, jamoat transporti dezinfeksiya qilinmoqda, politsiya niqobsiz odamlarni jarimaga tortmoqda, korxona va tashkilotlar xodimlaridan emlanganlik guvohnomasi talab qilinib, aks holda ularga ishdan bo‘shatish bilan tahdid qilinmoqda.
Izoh (0)