Turkmaniston aholisini koronavirusga qarshi emlashga tayyorlanmoqda

Ashxobod shahar sog‘liqni saqlash boshqarmasida 25-yanvar kuni yig‘ilish bo‘lib o‘tdi, unda mutaxassislar poytaxt tibbiyot muassasalari rahbariyatini aholini COVID-19’ga qarshi emlash uchun tibbiyot xodimlarini tayyorlash rejalari bilan tanishtirdi, deb xabar bermoqda “Xronika Turkmenistana”.

Birinchi bosqichda tibbiyot xodimlari, ikkinchi bosqichda ta’lim muassasalari o‘qituvchilari va huquqni muhofaza qilish idoralari xodimlari, shu jumladan, harbiy xizmatchilarni emlash rejalashtirilmoqda.

Sog‘liqni saqlash uylari rahbarlariga ularga biriktirilgan aholi ro‘yxatlarini tuzish, ularni yosh toifalari bo‘yicha ajratish bo‘yicha ko‘rsatma berildi. Ro‘yxat tayyor bo‘lgach, shahar sog‘liqni saqlash bo‘limiga topshirilishi kerak. Ro‘yxatlarga kiritilgan aholi soniga qarab, kerakli vaksina soni aniqlanadi va tegishli sog‘liqni saqlash uylariga o‘tkaziladi.

Emlashdan oldin odamlar analiz uchun qon topshiradi. Keyin ular bilan tushuntirish suhbati o‘tkaziladi va birinchi emlashdan 21 kun o‘tgach, ikkinchisini olish kerakligi haqida ogohlantiriladi.

Vaksinatsiyadan oldin nega qon olinishi haqida ma’lumot berilmagan. Taxminlarga ko‘ra, bu odamlarda antitana birligini aniqlash uchun. Koronavirusga qarshi antitanalarga ega bo‘lgan fuqaro emlanmaydi.

Nashrning ta’kidlashicha, bu rasmiylarning Turkmanistonda koronavirus yo‘qligi haqidagi rasmiy pozitsiyasiga zid keladi. Chunki koronavirus aniqlanmagan davlat fuqarolari orasida antitanaga ega odam ham bo‘lishi mumkin emas.

Ta’kidlanishicha, emlashlar 24 soat davomida amalga oshiriladi.

Ayni paytda emlashni bepul amalga oshirish rejalashtirilgan. Biroq mamlakatda tibbiy sug‘urtasi bo‘lmagan ko‘plab fuqarolar mavjud. Ular emlanadimi yoki yo‘qmi noma’lum.

Aholi qaysi vaksina bilan emlanishi ham aniq emas. Ayni paytda “Sputnik V” vaksinasi rasmiy ravishda Turkmanistonda ro‘yxatdan o‘tgan va Rossiyaning yana bir vaksinasi – “EpiVakKorona”ni ro‘yxatdan o‘tkazish ishlari olib borilmoqda.

Nashrning manbalariga ko‘ra, Pfizer va “Sputnik V” vaksinalarining kichik partiyalari 13-yanvar kuni Turkmanistonga yetkazib berilgan.

Shuningdek, prezident Gurbanguli Berdimuhamedov 20-yanvar kuni Turkmanistonga sport tadbirlariga kelgan sportchilar o‘zlari tanlagan vaksinalar bilan emlanishlari mumkinligini e’lon qilgan.

Avvalroq Gurbanguli Berdimuhamedov alabay itlari va axaltekin otlarining bayramini birlashtirish haqida buyruq bergani, Turkmaniston Adliya vazirligi internetga ulanish qoidalarini e’lon qilgani hamda Turkmaniston koronavirusga qarshi “Sputnik V”dan tashqari boshqa vaksinalarni ham ro‘yxatdan o‘tkazilishi haqida xabar berilgandi.