Afg‘onistonda Britaniya armiyasi bilan hamkorlik qilgan hamda “Tolibon” hokimyatga kelgach mamlakatdan evakuatsiya qilingan barcha afg‘onlar Britaniya hukumati qarori bilan, “Iliq kutib olish” operatsiyasi doirasida hech qanday cheklovlarsiz Buyuk Britaniyada qolishi mumkin bo‘ladi. Bu haqda Buyuk Britaniya hukumati saytida e’lon qilingan press-relizga tayanib, “Interfaks” xabar berdi.
Hujjatda aytilishicha, ushbu afg‘onlarning barchasi “hayotini tiklash, ish topish, o‘qishni davom ettirish va mahalliy jamoalarga qo‘shilish uchun zarur bo‘lgan muhim yordamni olishi kerak”.
Buyuk Britaniya bosh vaziri Boris Jonsonning bayonotida shunday deyiladi: “Biz Afg‘onistonda Qurolli Kuchlarimiz bilan ishlaganlardan chuqur qarzdormiz, men ularga va ularning oilalariga Buyuk Britaniyada o‘z hayotini tiklash uchun zarur yordamni ko‘rsatishga qaror qildim”.
“Men bu davr juda qiyin bo‘lishini bilaman, lekin umid qilamanki, ular Britaniya jamoatchiligi tomonidan bildirilgan qo‘llab-quvvatlash va saxovat to‘lqinidan jasorat oladi”, — deya qo‘shimcha qildi bosh vazir.
Hukumat press-relizda ma’lum qilinishicha, afg‘onistonlik bolalarga qo‘shimcha maktab o‘rinlarini yaratish uchun kamida 12 million funt ajratiladi, Buyuk Britaniya universitetlarida afg‘onistonlik talabalar va aspirantlar uchun 300 tagacha stipendiya ajratiladi. Ushbu toifadagi afg‘onlarning sog‘liqni saqlash xizmatlaridan foydalanishi uchun qo‘shimcha 3 million funt ajratilgan va ularning barchasiga COVID-19 ga qarshi vaksina taklif qilingan.
Izoh (0)