OAV: Turkmaniston koronavirusning yangi to‘lqini tufayli karantinga yopilmoqda

Turkmanistonning Lepab viloyati, Turkmanobod shahrida koronavirusga topshirilgan testlarning ijobiy chiqish holatlari o‘n baravar ko‘paydi. Avvaliga Ashxobodda, endi boshqa hududlarda savdo markazlari yopilmoqda, deya xabar berdi turkmen.news mustaqil nashri.

Xabarga ko‘ra, Turkmanobod shahridagi hududiy sanitariya-epidemiologiya stansiyasida COVID-19 ga test olish ishlari uch smenada kecha-yu kunduz davom etmoqda. Lebap viloyatini tark etmoqchi bo‘lganlar har biri 70 kishidan iborat 17 ta guruhga bo‘linadi, ya’ni kuniga 1190 kishi tekshiriladi. Bir oy oldin har kuni 3-4 ta ijobiy natija aniqlanar edi, hozir esa 30 ta atrofida. Ma’lumot olish uchun murojaat qilganlarning qariyb 2,5 foizida virus qayd etilmoqda.

Ta’kidlanishicha, koronavirus tashxisi qo‘yilgan kishilarga natija haqida to‘g‘ridan to‘g‘ri aytilmaydi. Ularga shunchaki hududni tark etishga ruxsat berilmaydi va “shifokor bilan maslahatlashish” tavsiya qilinadi.

Turkmaniston hukumati haligacha mamlakatga COVID-19 kirib kelganini yashirishga urinmoqda. Garchi amalda infeksiya borligiga shubha yo‘q bo‘lsa-da, amaldorlar bu haqda ochiqdan ochiq gapirishga qo‘rqmoqda.

24-avgust kuni ichida universitet talabalari bo‘lgan maxsus poyezd Turkmanoboddan Ashxobodga yo‘l olgandi. Lekin, turkmen.news manbalariga ko‘ra, poyezd Mariga qaytarilgan. O‘qishga yuborilmagan talabalar poyezddan tushgach, uch kun karantinda o‘tirgan.

23-avgustdan Ashxobodda maxsus patrullar do‘konlar, jumladan, oziq-ovqat do‘konlarini yopishni boshladi. “Berkarar” ulgurji bozori va savdo markazi yopildi. Bir qator shifoxonalarda kutilmaganda ko‘plab bemorlar go‘yo o‘rinlarni bo‘shatishi kerakdek, uylariga jo‘natildi. Ma’rakalarni tashkil etishda sanitariya talablari kuchaytirildi: endi ma’raka chodirlari ichidagi hamma odamlar niqob taqmoqda, kirishga esa antiseptik qo‘yiladi.

COVID-19 bilan bog‘liq epidemiologik vaziyat yomonlashayotgani sababli o‘tgan haftada Ashxoboddagi ko‘p qavatli uylarning kirish qismini va avtobus salonlarini dezinfeksiya qilish ishlari qayta tiklandi.

Politsiya niqobsiz odamlarga 25 manat (76 ming so‘m) jarima solmoqda. Poytaxtdagi korxona va tashkilotlar xodimlaridan emlanganlik guvohnomasi talab qilinmoqda, aks holda ularning ishdan bo‘shatilishi aytilmoqda.

18 yoshdan oshgan barcha fuqarolarni majburiy emlash haqidagi qaror 7-iyulda e’lon qilingan bo‘lsa-da, uning ijrosi endi boshlandi. Emlanish uchun murojaat qilayotgan odamlarning keskin oqimi tufayli kasalxona xodimlari vaksinatsiyani tasdiqlovchi hujjatlarni o‘z vaqtida rasmiylashtirishga va berishga ulgurmayapti.

turkmen.news manbalari xabar berishicha, viloyatlardagi holat ham poytaxtdan qolishmaydi. Turkmanboshida “Kenar” bozori, kafe va go‘zallik salonlari allaqachon yopilgan. Turkmanobodda do‘kon sotuvchilariga yaqin orada faqat sotuvchilari emlangan savdo markazlari o‘z ishini davom ettirishi mumkinligi aytilgan. Avvalroq Lebap viloyat axloq tuzatish muassasalari xodimlari mahbuslar orasida kasallanish holatlarining ko‘payishi tufayli kuchaytirilgan xizmat rejimiga o‘tkazilgan edi.

“Xronika Turkmenistana” xabariga ko‘ra, koronavirus bilan kasallanganlar soni keskin oshgani sababli rasmiylar mustaqillikning 30 yilligiga bag‘ishlangan paradni tashkil etish to‘g‘risida bir to‘xtamga kela olmayapti — faqat harbiy parad bilan cheklaniladimi yoki unga talabalar va davlat xizmatchilari jalb qilinadimi, so‘roq ostida.

Taxminlarga ko‘ra, mamlakatga koronavirusning o‘ta yuqumli delta shtammi kirib kelgan. Turkmaniston hukumati mamlakatga koronavirus kirib kelganini hali tan olmagan.