Xitoy hukumati voyaga yetmaganlarning onlayn videoo‘yinlarga sarflaydigan vaqtini cheklab qo‘ydi. Tegishli press-reliz XXR Matbuot va nashrlar bosh boshqarmasi tomonidan e’lon qilingan.
Endi Xitoyda 18 yoshdan kichiklarga faqat juma, shanba, yakshanba va bayram kunlarida faqat bir soat videoo‘yin o‘ynashga ruxsat beriladi. Shu bilan birga, ular o‘yinlarni qat’iy jadval bo‘yicha — mahalliy vaqt bilan soat 20:00 dan 21:00 gacha o‘ynashi mumkin bo‘ladi. Qolgan vaqtlarda onlayn platformalarga bolalarga xizmat ko‘rsatish taqiqlandi.
Foydalanuvchilarning yoshini tekshirish uchun o‘yinlarda ro‘yxatdan o‘tishda, ularning haqiqiy ismi va telefon raqamlarini ko‘rsatish talab qilinadi. Shu paytgacha o‘smirlarga ish kunlarida kuniga bir yarim soat, dam olish kunlarida esa uch soat videoo‘yin o‘ynashga ruxsat berilayotgan edi.
Xitoy hukumatining fikricha, bolalar videoo‘yinlarga qaram bo‘lib qolmoqda, shuning uchun so‘nggi bir necha yil mobaynida o‘yinlardan foydalanish shartlari muntazam ravishda kuchaytirilgan.
Avgust oyining boshlarida, hukumat matbuoti o‘yinlarni “ruhiy afyun” deb ataganidan so‘ng, mamlakatning eng yirik videoo‘yinlar nashriyoti Tencent o‘z ixtiyori bilan bolalarning o‘yin sotib olishini taqiqladi.
Xitoy hukumati 2019-yilda voyaga yetmaganlarning onlayn o‘yin o‘ynash vaqtiga cheklovlar qo‘ygan. Hukumat o‘smirlar o‘rtasida qimorbozlik tarqalishining oldini olishga va o‘yinlarning maktab o‘quvchilari ta’limiga salbiy ta’sirini cheklashga intilib keladi. O‘shanda bolalar va o‘smirlarga soat 22:00 dan 08:00 gacha o‘yin o‘ynash taqiqlangandi. Bundan tashqari, ish kunlarida (juma kunidan tashqari) voyaga yetmaganlarga kuniga 90 daqiqadan ko‘p bo‘lmagan vaqt o‘yin o‘ynashga ruxsat berilgan.
Izoh (0)