Туркманистонда юқумли касалликларнинг олдини олиш мақсадида мактабларда ўқув йилини бошлаш 1 октябрга қолдирилди. Шу билан бирга, мамлакатда COVID-19 юқтириш ҳолати расман қайд этилмаган.
Ашхободдаги бир қатор мактаблар ўқитувчиларининг маълум қилишича, бугун, 1 сентябрь куни мактабларда фақат биринчи синф ўқувчилари учун тантанали сафда туриш тадбирлари ўтказилган.
Ўқитувчилар, шунингдек, таълим муассасаларига фақат биринчи синфдан олтинчи синфгача бўлган ўқувчилар таклиф этилганини хабар қилди. Улар шу ҳафтанинг охиригача ўқийди, сўнг 1 октябрга қадар таътилга кетади. Еттинчи–ўн биринчи синф ўқувчилари ўқишни бирйўла 1 октябрдан бошлайди.
Қайд этилишича, мамлакатнинг ўрта махсус ва олий ўқув юртлари талабаларига ўқиш қачон бошланиши ҳақида уларга кейинроқ хабар берилади.
Туркманистон президенти Гурбангули Бердимуҳамедов мамлакатда коронавирус борлигини ҳалигача инкор этмоқда, аммо аввалроқ у эпидемиологик хавфсизликка жавобгар вазирларни ишдан бўшатганди.
Мустақил ОАВ хабарларига кўра, Туркманистонда COVID-19 пандемиясининг навбатдаги авж олиши кузатилмоқда. Ашхободда бозорлар ва кафелар қайта ёпилган, жамоат транспорти дезинфекция қилинмоқда, полиция ниқобсиз одамларни жаримага тортмоқда, корхона ва ташкилотлар ходимларидан эмланганлик гувоҳномаси талаб қилиниб, акс ҳолда уларга ишдан бўшатиш билан таҳдид қилинмоқда.
Изоҳ (0)