Berdimuhamedov Turkmanistonda koronavirus borligini haligacha inkor etmoqda, ammo epidemiologik xavfsizlikka javobgar vazirlarni ishdan bo‘shatdi

Turkmaniston prezidenti Gurbanguli Berdimuhamedov 25-avgust kuni Vazirlar Mahkamasining kengaytirilgan yig‘ilishini o‘tkazdi va amaldorlar bilan Turkmaniston Favqulodda komissiyasining kasalliklar tarqalishiga qarshi kurashish bo‘yicha faoliyatini muhokama qildi.

Televizion kadrlardan ko‘rinib turibdiki, yig‘ilishda prezidentdan tashqari barcha ishtirokchilar niqob taqqan.

Davlat rahbarining bayonotiga ko‘ra, “hozir butun dunyoni qamrab olgan koronavirusning Turkmanistonga kirib kelishi va tarqalishining oldini olish choralarini kuchaytirish zarur; vazirliklar, idoralarda, mulkchilik shaklidan qat’i nazar, barcha korxonalarda ushbu virusga qarshi kurash choralari to‘g‘ri tashkil etilishi, sanitariya va epidemiologiya qoidalariga qat’iy rioya qilinishi shart.

Shu bilan birga, Berdimuhamedov epidemiya Turkmanistonga hali kirib kelmagan, deya ta’kidlashda davom etmoqda. Shunga qaramay, prezident oilaviy shifokorlar va ommaviy axborot vositalari orqali fuqarolarga “mamlakatning hamma burchaklarida” profilaktik chora-tadbirlarini ko‘rish zarurligi haqida tushuntirish o‘tkazishni buyurdi, ommaviy tadbirlar o‘tkazishni cheklash bo‘yicha takliflar tayyorlashga ko‘rsatma berdi.

Yig‘ilishda, shuningdek, davlat rahbari bir qator mansabdor shaxslarning ishdan olinishini e’lon qildi.

Bosh vazirning fan va ta’lim, sog‘liqni saqlash va sport masalalari bo‘yicha o‘rinbosari Mammetmurat Geldiniyazov ishidagi jiddiy kamchiliklari uchun ishdan olindi. Uning o‘rniga Saparturdi Toyliyev tayinlandi. U bir vaqtning o‘zida Turkmaniston Fanlar akademiyasi rahbari vazifalarini bajaradi.

Ta’lim vaziri O‘razgeldi Qurbonov ham ishidagi jiddiy kamchiliklari uchun lavozimidan ozod qilindi, uning o‘rniga Gurbangul Atayeva tayinlandi. Bunga qadar Atayeva Ayollar uyushmasi markaziy kengashi va Turkmaniston kasaba uyushmalari milliy markazini boshqargan.

Arslanqilich Qilichov sog‘liqni saqlash va tibbiyot sanoati vazirining o‘rinbosari — Davlat sanitariya-epidemiologiya xizmati rahbari lavozimidan ozod etildi. Uning o‘rniga Murat Mammedov tayinlandi. Mammedov bungacha yuqumli kasalliklar markazlari boshqarmasi bosh direktori bo‘lgan, uning o‘rnini Annamurat Rejepov egalladi.

Ishidagi jiddiy kamchiliklari uchun Turkmaniston Davlat migratsiya xizmati raisi, podpolkovnik  Bekmurat Ovezov vazifasidan olindi. Uning lavozimini Nazar Atagarayev egalladi.

Mustaqil OAV xabarlariga ko‘ra, Turkmanistonda COVID-19 pandemiyasining navbatdagi avj olishi kuzatilmoqda. Ashxobodda bozorlar va kafelar qayta yopilgan, jamoat transporti dezinfeksiya qilinmoqda, politsiya niqobsiz odamlarni jarimaga tortmoqda, korxona va tashkilotlar xodimlaridan emlanganlik guvohnomasi talab qilinib, aks holda ularga ishdan bo‘shatish bilan tahdid qilinmoqda. Hududlarda shifoxonalar to‘lgan va xodimlar yetishmayapti. Turkmaniston mustaqilligining 30-yilligiga bag‘ishlangan tantanalarda davlat xizmatchilarining ishtirok etish-etmasligi savol ostida.

Avvalroq Rossiyaning Ashxoboddagi elchixonasi masofadan ishlashga o‘tishini e’lon qilgan.