Dunyo va o‘zbek sportiga oid 31-avgust kunining muhim xabarlari dayjesti bilan tanishing.
O‘zbekiston
Yengil vazn toifasida harakat qiluvchi UFC jangchisi Liliya Shokirova antidoping qoidalarini buzganligi bois ikki yilga chetlatildi. Bu haqda AQSh antidoping agentligi (USADA) ma’lum qildi.
Qayd etilishicha, Liliyaning 2020-yil 5-dekabrda O‘zbekistonda topshirgan qon tahlilidan meldoniy moddasi topilgan. Bu modda UFC Antidoping qoidalariga ko‘ra taqiqlangan.
Jasur Yaxshiboyev jamoasini o‘zgartirdi. “Legiya” (Polsha) Yaxshiboyevni 2021/22-yilgi mavsum yakuniga qadar Moldovaning “Sherif” klubiga ijaraga berdi. “Sherif” joriy mavsumda Chempionlar Ligasiga yo‘l oldi. Jamoa guruh bosqichida “Real”, “Inter” va “Shaxtyor”ga qarshi o‘ynaydi.
Avvalroq “Legiya” Jasurni Chexiya klubiga ijaraga bergani haqida xabar berilgandi. Endilikda Yaxshiboyev faoliyatini Moldova chempionatida davom ettiradi.
Tokio shahrida Paralampiya o‘yinlari o‘tkazilmoqda. 31-avgust kuni o‘zbekistonlik bir nafar sportchi musobaqadagi ishtirokini o‘tkazdi. Server Ibragimov 10 metrga to‘pponchadan o‘q otish bo‘yicha finalda 177.4 ochko to‘plagan holda 5-o‘rinni egalladi. Endi Ibragimov 4-sentabr kuni 50 metrga to‘pponchada o‘q otish bahslarida o‘z imkoniyatlarini sinab ko‘radi.Jahon
“Manchester Yunayted” Krishtianu Ronaldu transferini rasman e’lon qildi. “Yuventus” ham hujumchining ingliz klubi bilan shartnoma imzolanganini tasdiqladi.
36 yoshli portugaliyalik “qizil iblislar” bilan ikki yillik shartnoma imzoladi. Shuningdek, bitimga uni yana bir yilga uzaytirish bandi kiritilgan.
Avvalroq “Manchester Yunayted” Ronaldu transferi uchun Turin klubiga 15 million yevro to‘lashi va bu summa 5 yil ichida to‘lab bo‘linishi haqida xabar berilgandi. Bundan tashqari, yana 8 million yevro miqdorida bonuslar ham ko‘zda tutilgan.
“Liverpul” Jordan Henderson bilan shartnomani uzaytirdi. Mersisayd klubi yarim himoyachi bilan uzoq yillik shartnoma imzolaganini ma’lum qildi. The Atletic xabariga ko‘ra, tomonlar 2025-yilgacha mo‘ljallangan bitimni imzolagan.
“Barselona” Serxio Agueroni La Liga ro‘yxatidan o‘tkazdi. Bu haqda klub rasmiy saytida xabar berildi.
Katalonlar sardorlari Serxio Buskеts va Xordi Alba maoshning pasayishiga rozi bo‘lgani bunga zamin yaratdi. Shu tariqa “Barselona” feyr-pley qoidalarini buzmagan holda yangi futbolchilarni ro‘yxatdan o‘tkazishning uddasidan chiqdi.
Avvalroq Xerard Pike maoshining kamayishiga rozi bo‘lgandi va bu orqali jamoa Memfis Depay va Erik Garsiyani ro‘yxatdan o‘tkazgandi.
31-avgust, seshanba kuni tunda Yevropada transfer oynasi yopiladi. Transfer oynasining so‘nggi kunida bir qator bitimlar imzolandi. Xususan, “Arsenal” Villian bilan o‘zaro kelishuv asosida shartnomani bekor qildi, Moyzi Kin esa “Yuventus”ga qaytdi. Transfer oynasining oxirgi soatlarida amalga oshirilayotgan transferlarni bu yerda onlayn kuzatib borish mumkin.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)