O‘yinlarni sotish, terma jamoadagi maoshi va chet eldan tushgan taklif haqida. Vadim Abramov bilan intervyu

O‘zbekiston terma jamoasi sobiq bosh murabbiyi Vadim Abramov YouTube’dagi Alter Ego loyihasiga bergan intervyu berdi. Quyida Abramovning o‘yinlarni sotish, terma jamoadagi maoshi va totalizator haqidagi fikrlari taqdim etiladi.

O‘yinlarni sotish haqida

Men o‘yinlarni sotish bo‘yicha chempionman? Bunday deyotganlar mening statistikamni olib qarasin: nechta o‘yin yutqazganman va kimga sotganman. Misol uchun, Olimpiya terma jamoasining BAAga qarshi o‘yinini olaylik, mengacha hech qaysi murabbiy hal qiluvchi bosqichgacha yetib bormagan. Men ikki marta boshqargan va ikki marta hal qiluvchi bosqichgacha borganman. O‘sha o‘yinda bizni Olimpiadadan yarim soat ajratib turgandi. Qaysi ahmoq bunday vaziyatda o‘yinni sotadi, ular nima haqida gapirmoqda o‘zi?

Futbolchilar sotadi o‘yinni, murabbiy emas. Bilasizmi, qanday qilib? Men ham sotishim mumkin, har qanday murabbiy kabi, bunda muammo yo‘q. Faqat buni amalga oshirish uchun futbolchilarga aytish kerak. O‘yinchilar esa tirik, ulardan so‘rasa bo‘ladi, detektor ham ishlatish mumkin, buning hech qanday qiyin joyi yo‘q. Vaqt o‘tgandan keyin baribir hammasi chiqib keladi. Ular shunday o‘ylashni xohlasa, o‘ylayversin. Yutqaza olmasligimdan faxrlanaman, bitta-ikkita o‘yinni yutqazaman, meni ishdan olib tashlashadi. Mendan oldin o‘sha bosqichlarga yaqin ham kelmagan odamlar esa ishlayvergan va ishlashda davom etmoqda.

2011-yilgi Osiyo Chempionati haqida

Musobaqaga yaxshi tayyorgarlik ko‘rgandik, Yevropa jamoalari bilan o‘yinlar o‘tkazgandik. O‘shanda ustimizdan kulishgandi ham, Albaniya terma jamoasi bilan o‘ynaganimizda bir toifa jurnalistlar har xil gaplarni yozgandi va albanlarning kuchiga juda past baho bergandi. Ularni tushunaman, ularning maqsadi bor, mayli o‘z ishlari bilan shug‘ullanaversin, balki ular shu tariqa o‘zbek futboliga yordam berar. Lekin o‘sha Albaniya keyin Angliyani ham yutgan. Biz katta ishni amalga oshirgandik va yaxshi tarkib yig‘ilgandi.

Avstraliyaga qarshi o‘yin haqida

Bu futbol. Aytish mumkinki, baxtsiz hodisa. Birinchi golgacha hammasi yaxshi ketayotgandi. Keyin ikkinchi gol va qizil kartochka. Shundan so‘ng bu o‘yinda g‘alaba qozona olmasligimizni tushundim va yoshlarga imkon berishga qaror qildim. Ular esa gol urishni xohladi va oldinga yugurib ketishni boshladi. Qarshi hujumlarda jazolanaverdik. Shunaqasi ham bo‘lib turadi. Nafaqat men, yetuk murabbiylarda ham shunday bo‘lib turadi. 6 marta 1:0 ga yutqazgandan ko‘ra bir marta 6:0 ga yutqazgan yaxshi.

Terma jamoadagi maoshi haqida

Oyiga 250 million olganmanmi? Sizga shunday javob beraman: 2011-yilda oyligim bir million ikki yuz ming so‘m bo‘lgan. O‘shanda bu narsa kimnidir qiziqtirganmi? Terma jamoada ham, “Bunyodkor”da ham maoshim mendan oldingilardan kam bo‘lgan. Buni ular ham biladi. Bu ma’lumotni ataylab chiqarib yuborishgan. Unda Ektor Kuperning ham oyligini aytishsin. Va oldingi murabbiylarnikini ham. Ularning ham, mening ham maoshimni aytishsin, shunda adolatdan bo‘ladi.

Totalizator haqida

G‘arbda bu biznes va hamma xuddi boshqa o‘yinlar kabi buni o‘ynaydi. Men ham bir vaqtlar o‘ynaganman, xo‘sh, nima qilibdi? Chunki Toshkentda o‘ynaydigan joy bor edi. 2008-yildan beri o‘ynamayman. Futbolni tushunganim uchun jonli efirda pul tikkanman va yutganman, normal holat. Shu yerdan men haqimda “totalizatorchi” degan gap chiqqan bo‘lsa kerak. O‘ynashni to‘xtatganimga sabab, bunday joylarning yopilgani bo‘lgan. Ishonasizmi, yo‘qmi, telefonda umuman o‘ynamaganman. Bunday saytlarni qanday ishlatishni ham bilmayman.

Aziz Haydarov bilan saralash bosqichidagi kelishmovchilik bo‘lgani haqida

Aziz Haydarov vaqt o‘tganidan keyin nima qilib qo‘yganini tushunib yetadi. Uning nima qilgani haqida esa gapirishni istamayman. U yosh yigit, o‘ylashimcha, unga hayotiy tajriba yetishmadi, vaziyatni va kim kimligini to‘g‘ri baholay olmadi. Terma jamoaga kelishimning tashabbuskori kim bo‘lganini bilmayman, lekin u oxirgi vaqtda terma jamoaga va menga nisbatan o‘zini yaxshi tutmadi.

Hozir nima bilan shug‘ullanayotgani haqida

Xorijdan taklif bo‘ldi, biroq rad etdim. Tavakkal qilmaslikka qaror qildim. Chempionat davom etayotgan vaqtda jamoani qabul qilmadim. Mavsumga tayyorlamagan jamoangiz bilan natija ko‘rsatish qiyin. Boshqa davlat, boshqa mentalitet. Nimanidir isbotlaydigan yoshdan o‘tganman. Shunchaki vaqtni isrof qilish bo‘ladi.

Shuncha futbolchini yetishtirdim. Oldinlari sovet davrida terma jamoaga bir futbolchini yetishtirib bergani uchun xizmat ko‘rsatgan murabbiy unvoni berilardi. Men qancha futbolchi tarbiyalaganimni va terma jamoa darajasiga olib chiqqanimni bilasizmi? Bu haqda statistika bormi? Yo‘q. Lekin totalizator va kelishilgan o‘yinlar haqida gapirasiz. Bu futbolchilar haqida esa hech kim hech nima demaydi. Alam qiladi, afsus. Har xil safsatalarni eshitish kulgili, lekin yaxshi narsalar haqida hech kim yozmaydi ham, gapirmaydi ham. Chunki bu hech kimga qiziq emas.

Vadim Abramov, futbol murabbiyi