Дунё ва ўзбек спортига оид 31 август кунининг муҳим хабарлари дайжести билан танишинг.
Ўзбекистон
Енгил вазн тоифасида ҳаракат қилувчи UFC жангчиси Лилия Шокирова антидопинг қоидаларини бузганлиги боис икки йилга четлатилди. Бу ҳақда АҚШ антидопинг агентлиги (USADA) маълум қилди.
Қайд этилишича, Лилиянинг 2020 йил 5 декабрда Ўзбекистонда топширган қон таҳлилидан мелдоний моддаси топилган. Бу модда UFC Антидопинг қоидаларига кўра тақиқланган.
Жасур Яхшибоев жамоасини ўзгартирди. «Легия» (Польша) Яхшибоевни 2021/22 йилги мавсум якунига қадар Молдованинг «Шериф» клубига ижарага берди. «Шериф» жорий мавсумда Чемпионлар Лигасига йўл олди. Жамоа гуруҳ босқичида «Реал», «Интер» ва «Шахтёр»га қарши ўйнайди.
Аввалроқ «Легия» Жасурни Чехия клубига ижарага бергани ҳақида хабар берилганди. Эндиликда Яхшибоев фаолиятини Молдова чемпионатида давом эттиради.
Токио шаҳрида Паралампия ўйинлари ўтказилмоқда. 31 август куни ўзбекистонлик бир нафар спортчи мусобақадаги иштирокини ўтказди. Сервер Ибрагимов 10 метрга тўппончадан ўқ отиш бўйича финалда 177.4 очко тўплаган ҳолда 5-ўринни эгаллади. Энди Ибрагимов 4 сентябрь куни 50 метрга тўппончада ўқ отиш баҳсларида ўз имкониятларини синаб кўради.Жаҳон
«Манчестер Юнайтед» Криштиану Роналду трансферини расман эълон қилди. «Ювентус» ҳам ҳужумчининг инглиз клуби билан шартнома имзоланганини тасдиқлади.
36 ёшли португалиялик «қизил иблислар» билан икки йиллик шартнома имзолади. Шунингдек, битимга уни яна бир йилга узайтириш банди киритилган.
Аввалроқ «Манчестер Юнайтед» Роналду трансфери учун Турин клубига 15 миллион евро тўлаши ва бу сумма 5 йил ичида тўлаб бўлиниши ҳақида хабар берилганди. Бундан ташқари, яна 8 миллион евро миқдорида бонуслар ҳам кўзда тутилган.
«Ливерпуль» Жордан Ҳендерсон билан шартномани узайтирди. Мерсисайд клуби ярим ҳимоячи билан узоқ йиллик шартнома имзолаганини маълум қилди. The Atletic хабарига кўра, томонлар 2025 йилгача мўлжалланган битимни имзолаган.
«Барселона» Серхио Агуэрони Ла Лига рўйхатидан ўтказди. Бу ҳақда клуб расмий сайтида хабар берилди.
Каталонлар сардорлари Серхио Бускетс ва Хорди Альба маошнинг пасайишига рози бўлгани бунга замин яратди. Шу тариқа «Барселона» фейр-плей қоидаларини бузмаган ҳолда янги футболчиларни рўйхатдан ўтказишнинг уддасидан чиқди.
Аввалроқ Херард Пике маошининг камайишига рози бўлганди ва бу орқали жамоа Мемфис Депай ва Эрик Гарсияни рўйхатдан ўтказганди.
31 август, сешанба куни тунда Европада трансфер ойнаси ёпилади. Трансфер ойнасининг сўнгги кунида бир қатор битимлар имзоланди. Хусусан, «Арсенал» Виллиан билан ўзаро келишув асосида шартномани бекор қилди, Мойзи Кин эса «Ювентус»га қайтди. Трансфер ойнасининг охирги соатларида амалга оширилаётган трансферларни бу ерда онлайн кузатиб бориш мумкин.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)