Yengil vazn toifasida harakat qiluvchi UFC jangchisi Liliya Shokirova antidoping qoidalarini buzganligi bois ikki yilga chetlatildi. Bu haqda AQSh antidoping agentligi (USADA) ma’lum qildi.
Qayd etilishicha, Liliyaning 2020-yil 5-dekabrda O‘zbekistonda topshirgan qon tahlilidan meldoniy moddasi topilgan. Bu modda UFC Antidoping qoidalariga ko‘ra taqiqlangan.
UFC yakkurashchilari shartnoma imzolashdan avval so‘nggi 12 oy davomida o‘zi foydalangan taqiqlangan moddalar haqida promoshenga ma’lumot berishi kerak. Buni amalga oshirgan sportchi aybdor bo‘lmaydi, biroq modda turiga qarab kamida olti oy jang qilmaydi va keyingi (kamida ikkita) doping tahlili xulosalari manfiy natija berishi kerak bo‘ladi. Shokirova shartnoma imzolash vaqtida meldoniydan foydalangani haqida ma’lumot bermagan.
Liliyaning ikki yillik diskvalifikatsiyasi qon tahlili olingan 2020-yilning 5-dekabridan boshlanadi. Shu tariqa Shokirova 2022-yilning 5-dekabriga qadar jang qila olmaydi.
Eslatib o‘tamiz, Liliya Shokirova 2020-yilning oktabr oyida UFC’da debyut qilgan va unda Loren Myorfiga yutqazib qo‘ygandi.
Avvalroq belbog‘li kurash ustasi Mardondek Kimsanov va Karate bo‘yicha Osiyo chempioni Nodira Jumaniyozova, sambochi Dilshod Choriyev va o‘zbekistonlik 7 nafar og‘ir atletikachi doping sababli 4 yilga diskvalifikatsiya qilingani ma’lum bo‘lgandi.
Izoh (0)